नयाँ दिल्ली। दिल्लीका पूर्व मुख्यमन्त्री तथा आम आदमी पार्टी (आप)का संयोजक अरविन्द केजरीवाललाई मदिरा (शराब) नीति सम्बन्धी कथित भ्रष्टाचार प्रकरणमा दिल्लीको राउज एभेन्यू अदालतले सबै आरोपबाट मुक्त गरेको छ।
अदालतले सोही मुद्दामा आप नेता तथा दिल्लीका पूर्व उपमुख्यमन्त्री मनीष सिसोदियालाई पनि आरोपमुक्त गर्ने आदेश दिएको छ। यो फैसला केन्द्रीय अनुसन्धान ब्युरो (सीबीआई)ले दायर गरेको मुद्दामा आएको हो।
अदालतले फैसला सुनाउँदै सीबीआईको अनुसन्धान प्रक्रियामा गम्भीर कमजोरी रहेको टिप्पणी गरेको बताइएको छ। हजारौं पृष्ठको आरोपपत्रमा साक्षीको बयानलाई समर्थन गर्ने ठोस सामग्री नदेखिएको अदालतको ठहर छ। विशेष न्यायाधीश जितेन्द्र सिंहले आरोपपत्रमा “भ्रामक दाबी” समावेश गरिएको उल्लेख गरेका छन्।
अदालतका अनुसार सिसोदियाविरुद्ध प्रथम दृष्टिमा मुद्दा बनाउने पर्याप्त आधार सीबीआईले प्रस्तुत गर्न सकेन। त्यस्तै, केजरीवाललाई समेत ठोस प्रमाणबिनै मुद्दामा जोडिएको अदालतले टिप्पणी गरेको छ। राउज एभेन्यू अदालतले केजरीवाल र सिसोदियासहित यस प्रकरणका सबै अभियुक्तलाई आरोपबाट मुक्त गरेको हो।
फैसलापछि सञ्चारकर्मीसँग प्रतिक्रिया दिँदै केजरीवाल भावुक देखिएका थिए। उनले केही वर्षदेखि भारतीय जनता पार्टीले लगाएका आरोपहरू अदालतले खारेज गरिदिएको उल्लेख गर्दै “सत्यको जीत भएको” बताएका छन्।
उनले भारतीय न्याय प्रणालीप्रति आफ्नो विश्वास रहेको दोहोर्याए। साथै प्रधानमन्त्री नरेन्द्र मोदी र केन्द्रीय गृहमन्त्री अमित शाहमाथि टिप्पणी गर्दै सम्पूर्ण प्रकरणलाई “राजनीतिक षड्यन्त्र” को संज्ञा दिएका छन्।
“आजाद भारतकै सबैभन्दा ठूलो राजनीतिक षड्यन्त्र रचेर आम आदमी पार्टीलाई समाप्त पार्ने प्रयास गरियो,” उनले भने, “तर अन्ततः सत्य स्थापित भयो।”
यसैबीच, केजरीवालकी पत्नी सुनीता केजरीवालले पनि सामाजिक सञ्जाल ‘एक्स’मार्फत प्रतिक्रिया जनाउँदै “सत्यको सधैं विजय हुन्छ” लेखेकी छन्।
प्रतिक्रिया