लेबनानको राजधानी बेरुतमा विष्फोटबाट भएको क्षतिप्रति राष्ट्रपति विद्या भण्डारीद्वारा शोक व्यक्त

काठमाडौं । राष्ट्रपति विद्यादेवी भण्डारीले लेबनानको राजधानी बेरुतमा भएको शक्तिशाली विष्फोटबाट मानवीय र भौतिक क्षति भएकोमा दुःख व्यक्त गरेकी छन् । राष्ट्रपति भण्डारीले लेबननका राष्ट्रपतिलाई सन्देश पठाउँदै गहिरो दुःख व्यक्त गरेकी हुन् ।

सन्देशमा राष्ट्रपति भण्डारीले समकक्षी आओनलाई विस्फोटमा ज्यान गुमाएकाका परिवारजन, लेवनान सरकार र त्यहाँका जनताप्रति हार्दिक समवेदना, सहानुभूति र ऐक्यबद्धता प्रकट गरेकी छन् ।

राष्ट्रपति भण्डारीले शोकको यस घडीमा विष्फोटमा घाइते भएकाहरुको शीघ्र स्वास्थ्यलाभको कामना गर्दै जारी उद्धारका प्रयास सफल हुने चाँडोभन्दा चाँडो त्यहाँको अवस्था पूर्ववत्रुपमा सामान्य बन्ने विश्वास सन्देशमा व्यक्त गरेकी छन् ।