रुपन्देहीमा थपिए ५४ नयाँ कोरोना संक्रमित, फेरिपनि बुटवलकै अग्रता

बुटवल । रुपन्देहीमा आईतबार पनि कोरोना संक्रमित थपिने क्रम जारी रह्यो । पछिल्लो २४ घण्टाको कोरोना संक्रमणको रिपोर्ट सार्वजानिक गर्दै स्वास्थ्य कार्यालय रुपन्देहीले ५४ जना संक्रमित थपिएको जनाएको छ । आईतबार थपिएकामा २१ महिला र ३३ पुरुष छन् ।

रुपन्देहीमा आईतबार पनि बुटवल उपमहानगरले संक्रमित थप्ने बिषयमा अन्य पालिकालाई उछिनेको छ । बुटवलमा आईतबार २९ जना नयाँ संक्रमित थपिएका छन् । अन्य पालिकाहरुमा आईतबार थपिएकाहरुमा सैनामैना नगरपालिकामा ७ जना, गैडहवा गाँउपालिकामा ६ जना, तिलोत्तमा नगरपालिकामा ५ जना, सिद्धार्थनगरमा ३ जना, देवदह नगरपालिका, ओमसतिया गाँउपालिका, राहिणी गाँउपालिका र सियारी गाँउपालिकामा १।१ जना कोरोना संक्रमित थपिएका छन् ।

आईतबार थपिएसँगै रुपन्देहीमा कुल संक्रमितको संख्या २०५४ पुगेको छ भने जिल्लामा २१ जना संक्रमितको ज्यान गएको छ । जिल्लामा १२६० जना कोरोना मुक्त भएर घर फर्केका छन् ।