कोरोना विशेष अस्पताल बुटवलमा एकै दिन २ जनाको मृत्यु

बुटवल । बुटवलको कोरोना अस्पतालमा उपचाररत दुई जना कोरोना संक्रमितको मृत्यु भएको छ ।

नवलपरासी पश्चिम र कपिलवस्तुबाट उपचारका लागि कोरोना बिशेष अस्पतालमा भर्ना भएका दुई जनाको एकै रात फरक फरक समयमा मृत्यु भएको लुम्बिनी प्रादेशिक अस्पतालले जनाएको छ । उनीहरु दुवैजनाको बिगत सात दिनदेखि भेन्टिलेटरको सहयोगमा उपचार चलिरहेको थियो ।

लुम्बिनी प्रादेशिक अस्पतालका प्रवक्ता डा. बिष्णु गौतमका अनुसार गत भदौ २७ गते अस्पताल भर्ना भएका नवलपरासी पश्चिमको रामग्राम नगरपालिका ३ का ४९ वर्षीय पुरुषको बिहीबार बिहान ४ बजे मृत्यु भएको छ ।

यसैगरी असोज १ गते अस्पताल भर्ना भएका कपिलवस्तुको बुद्धभूमि नगरपालिका–६ का ५० वर्षीय पुरुषको बिहान ७ बजे मृत्यु भएको छ ।

नवलपरासीका संक्रमितमा कलेजो र मिर्गौलाको दीर्घ रोग रहेको र कपिलवस्तुको मृतकमा मधुमेह र मिर्गौलाको दीर्घ रोग रहेको प्रवक्ता डा. गौतमले बताए ।