काठमाडौं । निर्वाचन आयोगको निर्णलाई देउवा समुहले नमान्ने भएको छ । गगन थापा नेतृत्वको कांग्रेसलाई आधिकारिकता दिएलगत्तै देउवा पक्षले त्यसलाई अस्वीकार गर्ने घोषणा गरेको हो ।
आयोगको निर्णय प्रति टिप्पणी गर्दै देउवा पक्षका नेता पूर्णबहादुर खड्काले निर्वाचन आयोगले षड्यन्त्रपूर्वक निर्णय गरेको आरोप लगाए । उनले आयोगको निर्णय विरुद्ध कानुनी र राजनीतिक दुवै लडाईं लड्ने बताए । उनले निर्वाचन आयोगले आधिकारिक र कानुनी रुपमा निर्वाचित समितिलाई एकपटक नबोलाइ निर्णय गरेकोमा असन्तुष्टि समेत जनाए ।
उता आयोगबाट मान्यता पाएको नेपाली कांग्रेसका उपसभापति विश्वप्रकाश शर्माले आयोगको निर्णयबाट नवीन कांग्रेसको शुरुवात भएको जनाएका छन् । उनले कांगै्रसका अग्रज नेताहरूलाई आवेग बिर्सन र एकताबद्ध भएर अगाडि बढ्न अनुरोध पनि गरेका छन् । ’विधि र प्रक्रियाको बाटोबाट जे निर्णय भएको छ, यसबाट नवीन कांग्रेसको शुरुवात भएको छ,’ उनले सामाजिक सञ्जालमा भनेका छन्, ‘अब आवेग बिर्सनुपर्छ, एकताबद्ध भएर अगाडि बढ्नुपर्छ ।’
निर्वाचन आयोगले शुक्रबार साँझ विशेष महाधिवशेनबाट निर्वाचित नेतृत्वलाई वैधानिकता दिएको थियो ।
प्रतिक्रिया