निर्वाचनका अवसरमा तीन दिन बिदा दिन आयोगको सिफारिस

काठमाडौं । निर्वाचन आयोगले प्रतिनिधिसभा निर्वाचनलाई लक्षित गर्दै तीन दिन सार्वजनिक बिदा दिन सरकारसमक्ष सिफारिस गरेको छ। आयोगले फागुन २०, २१ र २२ गते सार्वजनिक बिदा घोषणा गर्न नेपाल सरकारलाई अनुरोध गरेको हो।

आयोगका प्रवक्ता नारायणप्रसाद भट्टराईका अनुसार मतदानमा मतदाताको उत्साहजनक सहभागिता सुनिश्चित गर्ने उद्देश्यले उक्त सिफारिस गरिएको हो। प्रतिनिधिसभा सदस्य चयनका लागि फागुन २१ गते मतदान हुँदैछ।

सार्वजनिक बिदाबारे अन्तिम निर्णय भने मन्त्रिपरिषद् बैठकले गर्नेछ। आयोगको सिफारिसअनुसार निर्णय भए निर्वाचनको समयावधिमा करिब एक सातासम्म निरन्तर बिदा पर्न सक्ने देखिन्छ।

यसअघि फागुन १८ गते पहाडी जिल्लामा फागु पूर्णिमाको बिदा र १९ गते तराई क्षेत्रमा बिदा परेको छ भने फागुन २४ गते शनिबार परेको छ। यसरी हेर्दा निर्वाचन आसपासका दिनहरूमा लामो बिदाको सम्भावना रहेको छ।