बागलुङ । निरन्तरको वर्षातका कारण बागलुङ जिल्लाको बागलुङ र जैमिनी नगरपालिकामा ७७ घरमा क्षति पुगेको छ । २१५ घर उच्च जोखिममा छन् ।
बागलुङ नगरपालिकामा ६५ घर पहिराेले पूर्णरूपमा क्षति गरेको छ भने १५० घर उच्च जोखिममा छन् । निरन्तरको वर्षातका कारण नगरपालिकाभित्र बाढीपहिरो तथा जमिन भासिने कारणले ६५ घर विस्थापन भएको र १५० घर उच्च जोखिममा रहेको तथ्याङ्क सङ्कलन गरिएको छ ।
पूर्णरूपमा विस्थापित हुने गरी क्षति भएका ६५ घरलाई नगरपालिकाका तर्फबाट एक लाख ५० हजार रूपैयाँ राहत उपलब्ध गराउने निर्णय गरिको नगर प्रमुख जनकराज पौडेलले जानकारी दिए ।
घर बनाउन सघाउ पुग्ने गरी ६५ घरलाई एक लाख ५० हजारका दरले नगद उपलब्ध गराउने गरी विपद् व्यवस्थापन समितिले निर्णय गरेको हो ।
पौडेलका अनुसार जोखिममा रहेको घरका लागि तत्कालै १५ हजार रूपैयाँ दिइएकाे छ । यस्तै जैमिनी नगरपालिकामा १२ घरमा पूर्ण क्षति भएको तथा ५५ घर पहिराेको उच्च जोखिममा परेको नगरपालिकाका प्रमुख इन्द्रराज पौडेलले जानकारी दिए ।
उनले पछिल्लो वर्षातमा क्षतिको विवरण सङ्कलन भइरहेको जानकारी दिँदै क्षति तथा जोखिम घरको सङ्ख्या बढ्ने बताए । रासस
प्रतिक्रिया