जनतालाई डर वा भ्रममा राखेर सुशासन र समृद्धि हासिल हुँदैन : शंकर पोखरेल

काठमाडौं । नेकपा (एमाले)का महासचिव शंकर पोखरेलले राष्ट्रिय स्वतन्त्र पार्टी (रास्वपा) नेतृत्वको सरकारमाथि कडा आलोचना गर्दै वैकल्पिक शक्तिको रूपमा जनताबाट प्राप्त विश्वासलाई सरकारले नीति, दृष्टिकोण र कार्ययोजनामा रूपान्तरण गर्न नसकेको बताएका छन्।

सामाजिक सञ्जालमार्फत आफ्नो धारणा सार्वजनिक गर्दै पोखरेलले ‘वैकल्पिक शक्तिको सत्ता यात्रास् आशा, निराशा र विरोधाभास!’ शीर्षकमा सरकारको कार्यशैलीमाथि प्रश्न उठाएका हुन्।

उनले वैकल्पिक शक्तिका रूपमा उदाएको रास्वपासँग वैकल्पिक नीति र स्पष्ट मार्गचित्रको अपेक्षा गरिएको भए पनि हालसम्म त्यस्तो कुनै स्पष्ट नीति, योजना वा दृष्टिकोण देखिन नसकेको टिप्पणी गरेका छन्। उनका अनुसार सरकार स्पष्ट रणनीतिविना नै ‘भयको सिद्धान्त’ को आधारमा सत्तालाई प्रयोगशालाका रूपमा प्रयोग गरिरहेको देखिएको छ।

पोखरेलले प्रधानमन्त्री तथा मन्त्रीहरूले शपथ ग्रहणदेखि नै सस्तो चर्चा कमाउने शैली अपनाएको आरोप लगाउँदै अहिले उनीहरूको काममा गम्भीर विरोधाभास देखिन थालेको बताएका छन्। परिस्थितिमा सुधार आउनुको सट्टा दिनप्रतिदिन चुनौती थपिँदै गएको उनको दाबी छ।

आर्थिक अवस्थाबारे टिप्पणी गर्दै उनले नयाँ सरकार गठन भएयता आर्थिक सुधारको कुनै संकेत नदेखिएको उल्लेख गरेका छन्। बजारमा महँगी र कालोबजारी बढेको तथा समाजमा हत्या, हिंसा र अपराधका घटना समेत वृद्धि भएको उनको आरोप छ।

महासचिव पोखरेलले सरकारप्रतिको ‘आश र त्रास’ का कारण पीडितहरूको न्यायको आवाजसमेत कमजोर बन्दै गएको दाबी गरेका छन्। उनका अनुसार पहिले पीडितका पक्षमा खुलेर बोल्ने नागरिकहरू अहिले स्वतन्त्र रूपमा आफ्नो धारणा राख्न नसक्ने अवस्था सिर्जना भएको छ।

पोखरेलले रास्वपा नेतृत्वलाई जनताले दिएको लोकप्रिय जनादेशको सम्मान गर्न आग्रह गर्दै सस्तो लोकप्रियतावाद (पपुलिजम) र त्रासको भरमा केही समय सत्ता सञ्चालन गर्न सकिए पनि जनतालाई डर वा भ्रममा राखेर सुशासन र आर्थिक समृद्धि हासिल गर्न नसकिने चेतावनी दिएका छन्।