रुपन्देहीमा कोरोना थपिनेको संख्या २ अंकमा झ-यो, बाँकेमा थपिए ६० संक्रमित

बुटवल । बिहिबार पनि लुम्बिनी प्रदेशका दुई प्रमुख जिल्ला रुपन्देही र बाँकेले कोरोना संक्रमित थप्ने कार्यमा प्रतिस्पर्धा गरेको देखिएको छ । रुपन्देहीमा ८३ जना नयाँ कोरोना संक्रमित थपिँदा बाँकेमा ६० जना थपिएका छन् ।

रुपन्देहीको बुटवल उपमहानगरमा सबैभन्दा बढी ३१ जना संक्रमित थपिएका छन् भने सुद्धार्थनगरमा २१ जना, तिलोत्तमामा १५ जना कोरोना संक्रमित थपिएकाछन् । त्यसैगरि सैनामैनामा ७ जना, देवदहमा ३ जना, रोहिणीमा २ तथा सुद्धोधन, सियारी, ओमसतिया र कन्चनमा १।१ जना कोरोना संक्रमित थपिएका छन् । रुपन्देहीमा बिहिबार सम्ममा ६१ जना कोरोना संक्रमितको उपचारका क्रममा मृत्यु भएको छ भने ५४३१ जना जिल्लामा कुल संक्रमित पुष्टि भएका छन् ।

उता बाँकेमा बिहिबार २४ महिला र ३६ पुरुष गरि ६० जनामा कोरोना संक्रमण पुष्टि भएको छ । जिल्लाका ३ वटा पीसीआर ल्यावबाट आएको रिपोर्ट अनुसार भेरी अस्पतालबाट ३९ जना, नेपालगन्ज मेडिकल कलेजबाट १९ जना र बागेश्वरी ल्यावबाट २ जनामा कोरोना संक्रमण पुष्टि भएको हो ।

बाँकेमा बिहिबार सम्ममा कुल संक्रमितको संख्या २९०१ जना पुगेको छ भने जिल्लामा २९ जना संक्रमितको उपचारका क्रममा मृत्यु भएको छ । बाँकेमा उपचार गर्न आएका अन्य जिल्लाका १६ जनाको पनि बाँकेमा मृत्यु भएको छ । जिल्लमा अहिले सम्म २२७८ जना कोरोना मुक्त भएर घर फर्केका छन् ।