नेपालगञ्ज । नेपालगञ्ज बसपार्क नजिक रहेको एक ठूलो जुवाको खालमा प्रहरीले छापा मारेको छ ।
बाँके प्रहरीले ठूलो जुवा खालमा छापा मारेर १० जनालाई नियन्त्रणमा लिएको हो ।
नेपालगन्ज बसपार्कमा रहेको कृष्ण प्रसाद वलीको घरमा जुवातास खेलिरहेको छ भन्ने गोप्य सुचनाका आधारमा जिल्ला प्रहरी कार्यालय बाँकेका प्रमुख प्रहरी उपरीक्षक ओम बहादुर रानाको कमाण्डको टोलीले बुधबार राती साढे ८ बजे छापा मार्दा प्रहरीले नगद रकम रु २९,४८,७०० सहित जुवा खेलिरहेका १० जना पक्राउ गरेको प्रमुख प्रहरी उपरीक्षक ओम बहादुर राना जानकारी दिए ।
रानाका अनुसार, सन्तोष थापा, मेघनाथ कचबन्दिया, नविन घिमिरे, टोपबहादुर शाही, पब्लु भण्डारी, तरुण गौतम, रविन राणा, सन्तोष वली, कृष्णबहादुर सुवेदी, रहमान मियालाई जुवा खालबाट पक्राउ गरिएको छ ।
काटपत्ती खेलिरहेका उनीहरुको साथबाट २९ लाख ४८ हजार सात सय रुपैयाँ बरामद भएको रानाले जानकारी दिए ।
पक्राउ परेका व्यक्तिहरुलाई मुलुकी अपराध संहित ऐन २०७४ को परिच्छेद ५ दफा १२५ बमोजिम कानुनी कारवाही हुने प्रहरीले जनाएको छ ।
प्रतिक्रिया