काठमाडौं । नेपालले नेपाल भ्रमणमा रहेको भारतिय बिदेश सचिव हर्षवर्धन श्रृङगला मार्फत वार्ता र सम्वादमार्फत सीमा विवाद छिटो टुंग्याउन चाहेको सन्देश भारत सरकारलाई पठाएको छ ।
दुई दिने नेपाल भ्रमणमा रहेका भारतीय विदेश सचिव हर्षवर्धन श्रृंगलासंग भएको प्राय सबैजसो भेटमा नेपालले ऐतिहासिक दस्तावेज र प्रमाणहरुका आधारमा सिमा लगायतका विवाद सुल्झाउन आवश्यक रहेको प्रस्ताव नेपालको तर्फबाट राखिएको बताईएको छ ।
आज (बिहीबार) काठमाडौं आएलगत्तै भारतिय विदेश सचिव श्रृङ्गलाले नेपाली समकक्षी भरतराज पौड्यालसँग द्वीपक्षीय वार्ता गरेका थिए । परराष्टि सचिव स्तरिय वार्ता सकिएलगत्तै उनले परराष्ट्रमन्त्री प्रदीपकुमार ज्ञवाली, प्रधानमन्त्री केपी शर्मा ओली र राष्ट्रपति विद्यादेवी भण्डारीसँग समेत शिष्टाचार भेटवार्ता गरे ।
नेपालले यस अघि नै लिपुलेक, कालापानी र लिम्पियाधुरालाई समेटेर नयाँ नक्सा जारी गर्नुका साथै त्यसअनुसार निशान छाप परिर्वतन गर्न संविधान संशोधन समेत गरिसकेको छ । ऐतिहासिक दस्तावेज र प्रमाणहरुका आधारमा उल्लेखित भूमि आफ्नो भएको नेपालले लगातार दाबी गर्दै आएको छ ।
भारतीय विदेश सचिवसँग भएको औपचारिक वार्ता र शिष्टचार भेटहरुमा पनि नेपाली पक्षले ऐतिहासिक दस्ताबेज र प्रमाणहरुका आधारमा सीमा विवाद छिटो हल गर्नुपर्ने मत राखेको बताईएको छ ।
परराष्ट्र मन्त्री प्रदिप ज्ञवालीसँगको शिष्टाचार भेटका क्रममा मन्त्री ज्ञवालीले श्रृङ्गलासँग इतिहासले अधुरा छोडेका मुद्धाहरुलाई छिटो टुंग्याएर एउटा विश्वासको जग बनाएर अगाडि बढ्न आवश्यक रहेको बताएको परराष्ट्र श्रोतले उल्लेख गरेको छ ।
प्रधानमन्त्री निवास बालुवाटारमा भएको श्रृङ्गलासँगको भेटमा पनि प्रधानमन्त्री ओलीले सीमा लगायतका दुईपक्षीय विषयहरु वार्ताको माध्यमबाटै समाधान गर्न सकिने धारणा राखेका थिए ।
भेटका अवसरका भेट भएका सबैसँग भारतीय विदेश सचिव श्रृंगलाले दुई देशबीच केही समस्या रहेको स्विकार गर्दै समस्याकै कारण समग्र दुईपक्षीय सम्बन्धलाई बन्धक बनाउन नहुने धारणा राखेका थिए । ‘हाम्रो विचमा गहिरो मित्रता छ, केही विषयले त्यो सम्बन्धलाई बन्धक बनाउनु हुन्न ।’ उनले भने ।
श्रृङ्गलाले आजै राष्ट्रपति विद्यादेवी भण्डारीसँग पनि शिष्टाचार भेट गरेका थिए । भेटका अवसरका राष्ट्रपति भण्डारीले देशको विवादित विषयबारे भारतिय बिदेश सचिवसँग जिज्ञासा राखेका थिईन्।
प्रतिक्रिया