बैतडी । बैतडीकी भागरथी भट्टको बलात्कार तथा हत्या अभियोगमा पक्राउ परेका १८ वर्षीय दिनेश भट्टलाई प्रहरीले सार्वजनिक गरेको छ ।
जिल्ला प्रहरी कार्यालय बैतडीमा प्रहरीले पत्रकार सम्मेलन गरी भट्टलाई सार्वजनिक गरेको हो । पत्रकार सम्मेलनमा सुदूरपश्चिम प्रदेश प्रहरी प्रमुख उत्तमराज सुवेदीले प्रत्यक्षदर्शी, प्राप्त प्रमाण र साबिती बयानका आधारमा दिनेश भट्टराई पक्राउ गरिएको बताए ।
सोधपुछका क्रममा दिनेशले भागरथीका बुबाले आफ्नी फूपूलाई जवरजस्ती गरेको बदला लिन भागरथीको हत्या गरेको बयान दिएको प्रहरीले जनाएको छ । भट्ट भागरथीलाई न्याय माग्दै गरिएको प्रदर्शनमा समेत सहभागी हुँदै आएका थिए ।
जिल्ला अदालत बैतडीले आजै अभियुक्त भट्टलाई ५ दिन म्याद थप गरेर अनुसन्धान अगाडि बढाउन प्रहरीलाई अनुमति दिएको डीआईजी सुवेदीले जानकारी दिए । आरोपित भट्ट भागरथी पढ्ने सनातन धर्म माविमा कक्षा ११ अध्ययनरत छन् ।
बुधबार बिहान अभियुक्त भट्टविरुद्ध भागरथीका दाइ केशवराज भट्टले किटानी जाहेरी दर्ता गराएका छन् ।
अभियुक्त भट्टले आफूले भागरथीको घाँटी थिचेर हत्या गरेको स्वीकार गरेका छन् । उनलाई प्रहरीले घरबाट मंगलबार साँझ पक्राउ गरेको थियो ।
माघ २१ गते स्कुल गएकी १७ वर्षीया किशोरी भागरथी घर नफर्किएपछि खोजविन हुँदा उनको शव गत माघ २२ गते खोचलेक–चडेपानी ग्रामीण सडकखण्डको लवलेक जंगलमा सडकबाट १ सय मिटर तल झाडीमा फेला परेको थियो ।
प्रतिक्रिया