काठमाडौं । ओली पक्षीय नेकपा नजिकका सांसदहरुको बैठकले नेकपा संसदीय दलको मुख्यसचेतकबाट देव गुरुङलाई हटाएको छ ।
काठमाडौंको याक एण्ड यती होटलमा शुक्रबार बसेको ओली निकट सांसदहरुको बैठकले संसदीय दलको मुख्यसचेतकमा गुरुङलाई हटाएर विशाल भट्टराईलाई चयन गरेको छ । भट्टराई खोटाङबाट निर्वाचित सांसद हुन् ।
प्रधानमन्त्री एवं ओली नेकपाको संसदीय दलका नेता केपी शर्मा ओलीले दलको प्रमुख सचेतकमा विशाल भट्टराईलाई नियुक्त गरेको नियुक्तिपत्र बुझाएका छन् ।
गुरुङलाई संसदीय दलको मुख्यसचेतकबाट हटाएको चिठी ओली पक्षले नेकपा संसदीय दलको कार्यायलस्थित गुरुङको सचिवालयमा छोडेर गएको छ ।
नेकपाको विधान अनुसार दलको नेताले उपनेता, प्रमुख सचेतक र सचेतक मनोयन गर्ने व्यवस्था रहे पनि नेकपाका बुहमत सांसदहरुले ओलीलाई संसदीय दलको नेताबाट यसअघि नै हटाइसकेका छन् । प्रधानमन्त्री ओलीले प्रतिनिधिसभा विघटन गरे लगत्तै प्रचण्ड–नेपाल पक्षले दलको अलग्गै बैठक बसेर पुष्पकमल दाहाललाई दलको नेता चयन गरेका थियो ।
ओलीलाई संसदीय दलको नेताबाट हटाएको पत्र संसद सचिवालयमा दर्ता भैसकेको छ । कानुनी रुपमा पार्टी नफुटे पनि व्यवहारिक रुपमा पार्टी फुटिसकेका कारण ओलीले मुख्यसचेतकबाट गुरुङलाई गरेको कारवाहीले अर्थ राख्ने देखिँदैन ।
संघीय संसदका दुवै सदनमा नेकपाका २२३ सांसद रहेका छन् । प्रतिनिधिसभामा ओली विरुद्ध ९० जना सांसदको हस्ताक्षरसहित प्रचण्ड माधव निकट सांसदहरुले प्रधानमन्त्री ओली विरुद्ध अविश्वासको प्रस्ताव दर्ता गराएका थिए ।
प्रतिक्रिया