काठमाडौं । सर्वोच्च अदालतले नेपाल कम्युनिष्ट पार्टी नेकपा खारेज गर्ने फैसला विरुद्ध नेकपा माओवादी केन्द्र पुनरावलोकनमा जाने भएको छ ।
मंगलबार सिंहदरबारस्थित संसदीय दलको कार्यालयमा कानुनविदहरुसँगको छलफल पछि माओवादी केन्द्र पुनरावलोकनमा जाने निर्णयमा पुगेको हो ।
गत फागुन २३ गते सर्वोच्चले ऋषि कट्टेलको मुद्दामा फैसला गर्दै नेपाल कम्युनिस्ट पार्टी ९नेकपा० को एकता खारेज गर्ने फैसला गरको थियो । फैसलामा नेकपालाई खारेज गर्दै पार्टी एकीकरणअघिको अवस्थामा रहेका नेकपा एमाले र नेकपा माओवादी केन्द्र ब्युँताउनुपर्ने लेखिएको थियो ।
सो फैसला त्रुटीपूर्ण भएको भन्दै कानुनविदहरुले रिट निवेदकले माग्दै नमागेको विषय उल्लखे गरिएको बताउँदै आश्चर्य व्यक्त गर्दै आएका थिए । सर्वोच्चबाट राजनीतिक फैसला भएको भन्दै माओवादी केन्द्रका अध्यक्ष पुष्पकमल दाहाल प्रचण्डले समेत शंकासहितको आश्चर्य जनाएका थिए ।
अध्यक्ष प्रचण्डसहितका नेताहरुले कानुनविदहरुसँग छलफल गरेपछि सो फैसला विरुद्ध पुनरावलोकनमा जानु ठिक हुने निस्कर्षमा माओवादी केन्द्र पुगेको हो ।
छलफल पछि संसदीय दलका प्रमुख सचेतक देव गुरुङले भने ‘फैसला आएको ६० दिनभित्र पुनरावलोकनमा जानुपर्ने कानुनी व्यवस्था छ सोही अनुसार हामी पुनरावलोकनमा जान्छौँ ।’
प्रतिक्रिया