माओवादी केन्द्रको बैठक सर्‍यो, दिउँसो २ बजेदेखि सुरु हुने

काठमाडौं । नेकपा माओवादी केन्द्रको केन्द्रीय समय बैठकको समय सरेको छ । बिहान ११ बजेबाट हुने भनिएको बैठक आइतबार दिउँसो २ बजेदेखि मात्र सुरु हुने माओवादी केन्द्रीय कार्यालयका मुख्यसचिव श्रीराम ढकालले जानकारी दिएका छन् ।

आजको बैठक बत्तिसपुतलीस्थित अनुपम पार्टी प्यालेसमा हुने मुख्यसचिव ढकालले जानकारी दिएका छन् । आजको बैठकमा अध्यक्ष पुष्पकमल दाहाल प्रचण्डले एमसिसीबारे उठेका प्रश्नको जवाफ दिएपछि एजेण्डामा छलफल हुनेछ ।

राष्ट्रिय महाधिवेशन भएको लामो समय बितिसक्दा पनि माओवादीका केन्द्रीय पदाधिकारी चयन भएका छन्। आजको बैठकबाट केन्द्रीय पदाधिकारी चयन गर्ने तयारी छ । यसका लागि अध्यक्ष पुष्पकमल दाहाल प्रचण्डले आन्तरिक छलफल गरिरहेका छन् ।

यसअघि शुक्रबार माओवादी केन्द्रीय समिति बैठक बसेको थियो । पदाधिकारी चयनका लागि गृहकार्य गर्नुपर्ने जनाउँदै शनिबार बैठक बसेको थिएन ।

गत पुस ११ गते १८ गतेसम्म चलेको माओवादीको आठौं महाधिवेशनबाट प्रचण्ड अध्यक्ष चयन भएका थिए । त्यस्तै, महाधिवेशनले २९९ सदस्यीय केन्द्रीय समिति हुने व्यवस्था गरेको थियो ।

यससँगै १५ सदस्यीय पदाधिकारी रहने गरी विधान संशोधन गरेको थियो । जसअनुसार, एक जना अध्यक्ष, एक जना वरिष्ठ उपाध्यक्ष, ६ जना उपाध्यक्ष, एक जना महासचिव, दुई जना उपमहासचिव, तीन जना सचिव र एक जना कोषाध्यक्ष रहनेछन् ।