काठमाडौं । काठमाडौंको कमलादीमा सुन सहितको झोला फ्याँकेर भाग्ने गाडी प्रकरणमा अनुसन्धान गर्न प्रहरीले छानविन समिति गठन गरेको छ ।
खुल्ला सडकमा झोला फ्याँकेर भाग्दा समेत गाडी र गाडीमा सवार ब्यक्ति पक्राउ गर्न नसक्ने प्रहरी अधिकारी र प्रहरीका बिषयमा छानविन गर्न प्रहरीले समिति गठन गरेको हो । आधा केजी सुन र चाँदी १४ किलोको झोला फलेर भाग्ने गाडी समात्न नसक्ने प्रहरी अधिकारी र प्रहरी कर्मचारी उपर छानविन गर्न महानगरीय अपराध अनुसन्धान महाशाखाका प्रमुख एसएसपी दिपक थापाको नेतृत्वमा समिति गठन भएको प्रहरीले जनाएको छ ।
समितिमा एसएसपी किरण बज्राचार्य, एसपी सोमेन्द्रसिंह राठौर, डीएसपी दुर्गा दाहाल र राजकुमार केसी संलग्न छन् । सडकमा प्रहरीले चेकजाँच गरेको देखे लगत्तै कृष्ण पाउरोटीबाट कमलादी तर्फ जाँदै गरेको स्कार्पियो गाडी नरोकिइ कपडाको झोला फ्याकेर भागेको थियो ।
फ्याँकिएको झोलाबाट साढे १४ किलो चाँदी र आधा किलो सुन बरामद भएको थियो । काठमाडौं प्रहरी प्रमुख एसएसपी श्यामलाल ज्ञवालीले मंगलबार पत्रकार सम्मेलन गर्दै फरार गाडी र भेटिएको सुन र चाँदीका बिषयमा जानकारी दिएका थिए ।
राजधानी जस्तो संवेदनशील क्षेत्रबाट गाडी उम्किन सफल हुनुमा सुरक्षा अधिकृतहरुको कमजोरी रहेको सुरक्षाका जानकारहरुले टिप्पणी गरेपछि प्रहरीले छानवीन समिति गठन गरेको हो । तत्काल घटनास्थलमा खटिएका प्रहरी अधिकारीले प्रयासका बाबजुद गाडीलाई नियन्त्रणमा लिन नसकिएको बताएका थिए ।
प्रतिक्रिया