चीनको राष्ट्रिय स्वास्थ्य आयोगका अनुसार बिहीबार ५७ जना नयाँ कोराना संक्रमित थपिएका छन् ।
जसमध्ये ३७ जनामा लक्षसहितको कोरोना देखिएको छ भने २० जनामा कुनै पनि लक्षण देखिएको छैन ।
चीनको स्वास्थ्य आयोगले लक्षणसहितको र लक्षण नभएका कोरोना संक्रमितको अलग अलग तथ्याङ्क राख्ने गर्छ ।
यद्यपी, चीनमा बिहीबार कोरोना संक्रमणकै कारण कसैको पनि मृत्यु भने भएको छैन ।
जोन हप्किन्स विश्वविद्यालयको तथ्याङ्क अनुसार चीनको कुल ८८ हजार ३२८ जनामा कोरोना पुष्टि भएको छ । जसमध्ये ४ हजार ६७७ जनाको मृत्यु भएको छ ।
कोरोना भाइरसको सबैभन्दा पहिला संक्रमण फैलिए पछि चीन कडा मेहनत र अनुशासनमा रहेर भाइरसको नियन्त्रण गर्न सफल भएको थियो ।
अहिले चीनमा निकै न्यून स्तरमा मात्र संक्रमितहरु देखिने गरेका छन् । यद्यपी, चीनले कोरोना भाइरसको परीक्षण दरलाई भने दिनप्रतिदिन बढाउँदै लगेको छ ।
चीनले अहिले दिनमा ४८ लाख ४ हजार जनाको कोरोना परीक्षण गर्न सक्ने क्षमता वृद्धि गरेको छ ।
प्रत्येक दिन ४८ लाख बढीको परीक्षण गर्नसक्ने क्षमता बनाएको चीनको उद्योग एवं सूचना प्रविधि मन्त्रालयका उपाध्यक्ष वाङ जियाङपिङले बताए । यसका लागि देशभरमा ५ हजार मेडिकल संस्था र ३८ हजार प्राविधिकहरुले काम गरेका छन् ।
उपाध्यक्ष वाङले भने, २० करोड परीक्षण किट्स देशभरका अस्पताल, रोग नियन्त्रण केन्द्र, बन्दरगाह र तेस्रो पक्ष परीक्षण एजेन्सीलाई वितरण गरिएको छ । -एजेन्सी
प्रतिक्रिया