रुपन्देहीमा थपिए २१ नयाँ संक्रमित, जिल्लामा संक्रमित संख्या ६५२, ५ जनाको मृत्यु

बुटवल । रुपन्देहीमा पछिल्लो २४ घण्टामा २१ जना नयाँ कोरोना संक्रमित थपिएका छन् । स्वास्थ्य कार्यालय रुपन्देहीका अनुसार पछिल्लो २४ घण्टामा १७ जना पुरुष र ४ जना महिलामा कोरोना संक्रमण पुष्टि भएको हो ।

आईतबार ६ बजे सम्म प्राप्त रिपोर्टका आधारमा बुटवल उपमहानगरपालिकामा ५ जना, सिद्धार्थनगर नगरपालिकामा १ जना रोहिणी गाँउपालिकामा ७ जना, कञ्चन गाँउपालिकामा २ जना, मायादेबी गाँउपालिकामा १ जना, देवदह नगरपालिकामा ३ जना, तथा कोटहिमाई र सम्मरीमाई गाँउपालिकामा १।१ जनामा संक्रमण पुष्टि भएको छ ।

रुपन्देहीमा हालसम्म ६५२ जनामा संक्रमण पुष्टि भएको छ भने ३४५ जना कोरोना मुक्त भएर घर फर्केका छन् । जिल्लामा ५ जनाको मृत्यु भएको छ । ३०२ जनाले बिभिन्न आइसोलेसन केन्द्र र आइसोलेसन अस्पतालमा उपचार गराईरहेका छन् ।