नेपालगन्ज । बाँकेमा कोरोना संक्रमितहरु थपिने क्रमसँगै कम उमेरका संक्रमितहरुको मृत्यु हुने जोखिम पनि बढेको छ ।
पछिल्लो १ महिनामा बाँकेमा मृत्यु हुनेहरुको उमेर समूह ६० वर्ष मुनिका पनि देखिएका छन् ।
पहिलो पटक कोरोना संक्रमणकै कारण एक जना वरिष्ठ चिकित्सकको समेत मृत्यु भएपछि बाँकेमा जोखिम बढेर गएको आंंकलन गरिएको छ ।
स्वास्थ्य कार्यालय बाँकेले दिएको जानकारी अनुसार बाँकेमा हाल कोरोना संक्रमण भएर उपचार गराइरहेका बिरामीमध्ये २० जना गम्भिर अवस्थामा रहेका छन ।
जिल्लमा गम्भिर अवस्थामा रहेका संक्रमितहरुमा भेरी अस्पतालमा १६ जना र नेपालगन्ज मेडिकल कलेज, शिक्षण अस्पताल कोहलपुरमा ४ जना छन् ।
बाँकेमा आइसोलेसन अस्पतालमा भर्ना भएका लक्षण सहितका कोरोना संक्रमितहरुको संख्या १०६ जना रहेको स्वास्थ्य कार्यालय बाँकेका अधिकृत एवं कोरोना फोकलपर्शन नरेशबाबु श्रेष्ठले जानकारी दिए ।
स्वास्थ्य अवस्था समान्य रहेका ४२ जनाले शिक्षण अस्पताल कोहलपुरमा उपचार गराइरहेका छन् भने लक्षण नदेखिएका ३९ जना संक्रमितहरु होम आइसोलेसनमा रहेका छन ।
आइसोलेसनमा रहेका मध्य भेरी अस्पतालमा ४२ जना र शिक्षण अस्पताल कोहलपुरमा २ गरी ४४ जना मध्यम खालका विरामि रहेको फोकलपर्शन श्रेष्ठले बताए ।
जिल्लामा संक्रमित थपिने क्रम लगातार बढेपछि भेरी अस्पतालमा सञ्चालनमा रहेको कोरोना बिशेष वार्डको स्तरोन्नती गर्दै ७५ बेड थप्ने निर्णय गरिएको छ ।
गत बुधबार बसेको जिल्ला बिपद ब्यवस्थापन केन्द्रले भेरी अस्पतालमा कोरोनाका संक्रमितको उपचारका लागि ७५ बेड थप्ने निर्णय गरेको हो ।
तत्काल ७५ बेड थप गर्नका लागि बाँकेका स्थानीय तहबाट १ करोड प्रदान गर्ने निर्णय भएको बाँकेका प्रमुख जिल्ला अधिकारी रामबहादुर कुरुम्वाङले बताएका छन् ।
प्रजिअ कुरुम्वाङले १ महिना पहिलेदेखि नै संक्रमित थपिने क्रम बढ्दै गएको भन्दै २०० बेडको कोरोना अस्पताल बनाउन आवश्यक रहेको कुरा आफ्नो फेसबुकमा पोष्ट गर्दै आएका थिए । उनको पहलमा बाँकेमा राष्ट्रसेवक कर्मचारी, संघसंस्था तथा सरकारी र गैर सरकारी संस्थाबाट आर्थिक सहयोग उठाउने अभियान सुरु भएको थियो ।
राष्ट्रसेवक कर्मचारीहरुबाट १५ लाख अस्पताल निर्माणका लागि सहयोग उठेको र अन्य दाताहरुबाट समेत गरि ५० लाख बढी रकम संकलन भएको प्रजिअ कुरुम्वाङले बताए ।
प्रतिक्रिया