काठमाडौं । नेपाली कांग्रेसका सभापति शेरबहादुर देउवाले छठपर्वको अवसरमा शुभकामना व्यक्त गरेका छन ।
छठपर्वलाई नेपालको तराई क्षेत्रमा बसोबास गर्ने नेपालीहरूले अति श्रद्धाका साथ सूर्य भगवानको आराधना गरेर मनाइने महत्त्वपूर्ण र पवित्र पर्व भन्दै सभापति देउवाले सम्पूर्ण तराईवासी दाजुभाइ तथा दिदीबहिनीहरूमा सुख, शान्ति, समृद्धि र सफलताका लागि शुभकामना प्रकट गरेका हुन ।
उनले नेपाल विभिन्न चाडपर्व, धार्मिक एवं सांस्कृतिक रीतिरिवाजले सम्पन्न मुलुक भएको बताए । यी प्रत्येक धार्मिक र सांस्कृतिक रीतिरिवाजलाई सबैले आदर र सम्मान गर्ने सद्भावयुक्त परम्परा रहेको पनि उनको भनाइ छ ।
सबै चाडपर्वहरू सामाजिक सम्बन्ध र सांस्कृतिक सौहाद्र्रताका धरोहर रहेको उल्लेख गर्दै सभापति देउवाले चाडपर्वले सामूहिक भावनालाई अझ विकसित गरी सबैमा एकता र मेलमिलापको आधार खडा गर्न सहयोग पुर्याएको बताएका छन ।
उनले कोभिड-१९ संक्रमणको जोखिम रहेको अवस्था रहेकोले स्वास्थ्य सुरक्षाका मापदण्डलाई पूर्णरूपले पालना गर्दै भौतिक दूरी कायम गरेर पर्व मनाउन आग्रह पनि गरेका छन ।
प्रतिक्रिया