काठमाडौं । नेकपाका स्थायी कमिटी सदस्य भीम आचार्यको नाम मुख्यमन्त्रीका लागि प्रस्तावित गर्दै प्रदेश नम्बर १ को मुख्यमन्त्री शेरधन राई विरुद्ध आज (आइतबार) अविश्वास प्रस्ताव दर्ता हुने निश्चित भएको छ ।
प्रचण्ड-नेपाल पक्षले आइतबार कार्यालय खुले सँगै मुख्यमन्त्री राईविरुद्ध अविश्वास प्रस्ताव दर्ता गराउने तयारी गरेको प्रदेश नम्बर १ का एक सांसदले बताए ।
अविश्वासको प्रस्ताव दर्ता गर्ने निश्चित भएपछि प्रदेश १ को प्रदेश सरकारमा नेकपा प्रचण्ड-नेपाल पक्षधर तीन मन्त्रीले आइतबार बिहान राजीनामा दिएका छन् ।
सामाजिक विकासमन्त्री जीवन घिमिरे, सामाजिक विकास राज्यमन्त्री जसमाया गजमेर र उद्योग, पर्यटन, वन तथा वातावरण राज्यमन्त्री विजय विश्वासले राजीनामा दिएको नेकपा प्रचण्ड-नेपाल पक्षको उच्च स्रोतले बताएको छ ।
प्रधानमन्त्री केपी शर्मा ओलीले राज्यमन्त्री गजमेरलाई केन्द्रीय सदस्यमा नियुक्त गरेको भएपनि उनले त्यसलाई अस्वीकार गर्दै प्रचण्ड–नेपाल पक्षमा बस्ने निर्णय गरेकी थिइन् ।
यसअघि शनिबार साँझ मात्रै मुख्यमन्त्री राईले अविश्वास प्रस्ताव ल्याउने तयारी गरेको भन्दै प्रदेश सरकारका आर्थिक मामिला तथा योजनामन्त्री इन्द्र आङ्बोलाई बर्खास्त गरेका थिए।
अविश्वास प्रस्तावमा प्रचण्ड-नेपाल समूहका ४४ सांसदको समर्थन रहेको बताईएको छ। प्रस्ताव पारित गराउन भने ४७ मत आवश्यक पर्छ।
प्रतिक्रिया