बुटवल । स्थानीयबासीको बैकल्पिक व्यवस्था नगरि अर्थमन्त्री विष्णु पौडेल मोतिपुर औद्योगिक कोरिडोरको शिलान्यास गर्न पुगेपछि ६ दशक देखि मोतिपुर क्षेत्रमा बस्दै आएका स्थानीयले प्रतिकार गरेका छन् ।
औद्योगिक क्षेत्र स्थापना हुने चर्चा चलेदेखि नै आफ्नो बैकल्पिक व्यवस्था नगरी सो क्षेत्र नछाड्ने अडान लिँदै आएपनि सरकारले जबर्जस्ती औद्योगिक क्षेत्र विकार लिमिटेडका नाममा लालपुर्जा लिकाल्दै कोरिडोरको काम अगाडि बढाएको छ ।
सर्वोच्चको प्रतिनिधिसभा पुनर्स्थापनाको फैसलाका कारण स्थगित भएको शिलान्यासको कार्यक्रमलाई निरन्तरता दिँदै औद्योगिक क्षेत्र विकास लिमिटेडले शिलान्यास गर्ने कार्यक्रम तय गरेपछि बिहिबार देखि नै सो क्षेत्रमा स्थानीयबासीले अवरोध सिर्जना गरेका थिए ।
सरकारले ठैलो संख्यामा प्रहरी तैनाथ गरेर शिलान्यास गर्न थालेपछि स्थानीयले प्रतिकार गर्दा आज मोतिपुर क्षेत्रमा पटक पटक झडप भएको छ । प्रहरीको लाठी प्रहारबाट २ जना स्थानीय घाईते भएका छन् ।
बिहिबार शिलान्यासका लागि तयार गरिएको मञ्च स्थानीयले भत्काईदिएपछि रातारात शसस्त्र प्रहरीले मञ्च खडा गरेर अर्थमन्त्री पौडेल शिलान्यास गर्न मोतिपुर पुगेका थिए ।
बिहानै देखि बालबच्चा र जेष्ठ नागरिकसहित कार्यक्रमस्थल घेर्न आएका स्थानीयलाई प्रहरीले हटाउन खोज्दा झडप भएको हो ।
मोतिपुर औद्योगिक कोरिडोरका लागि अतिक्रमण गरेको ८१३ बिगाहा जमिन मध्य २५० बिगाहा जमिनमा बिगत ५५ वर्ष देखि ३ हजार घर परिवार बस्दै आएका छन् ।
तस्वीर : स्वस्तिक श्रेष्ठ
प्रतिक्रिया