म्यानमारको सैन्य ‘कू’ विरुद्धको आन्दोलनमा एकैदिन ३८ प्रदर्शनकारीको मृत्यु

एजेन्सी । म्यानमारको सैन्य कू विरुद्ध चलिरहेको आन्दोलनमा आइतबार ३८ जनाको मृत्यु भएको छ । देशका विभिन्न शहरमा भएका प्रर्दशनमा त्यहाँको सुरक्षा फौजले चलाएको गोली लागि ३८ जनाको मृत्यु भएको हो ।

आइतबारको दिनलाई सैन्य कू भएयताकै सबैभन्दा घातक दिनको रूपमा लिइएको म्यानमारका अभियानकर्मीहरूले बताएका छन । द एसिस्टेन्स एशोसिएसन फर पोलिटिकल प्रिजनर्स (एएपीपी) ले मुख्य शहर याङ्गुनको एउटा औद्योगिक क्षेत्रमा भएको झडपमा कम्तीमा २१ प्रदर्शनकारीहरू मारिएको जनाएको छ ।

बाँकी मृत्यु देशका विभिन्न भागमा भएका हुन । याङ्गुनमा प्रदर्शनकारीहरूले लाठी र छुरीको प्रयोग गरेपछि सुरक्षा फौजले गोली चलाएको थियो । त्यहाँको एक औद्योगिक क्षेत्रमा चिनियाँ व्यवसायमाथि हमला भएपछि याङ्गुनको धेरैजसो भागमा सैन्य कानून लागु गरिएको जनाइएको थियो ।

चीनले म्यान्मारको सेनालाई सहयोग गरिरहेको प्रदर्शनकारीहरूले विश्वास गरिरहेका छन । बेइजिङले फलामे डन्डी, बन्चरो र पेट्रोल बोकेका मानिसहरूले १० वटा चिनियाँ कारखानामा आगो लगाइदिएको जनाइएको छ ।

क्षति पुग्नेमा धेरैजसो लुगा उत्पादन गर्ने कम्पनी र तिनका भण्डारणहरू रहेको जनाइएको छ । एउटा चिनियाँ होटलमा समेत प्रदर्शनकारीहरुले हमला बिबिसीले जनाएको छ ।