काठमाडौं । नेपाली कांग्रेसको पदाधिकारी बैठक बस्ने भएको छ । सभापति शेरबहादुर देउवाले आइतबार दिउँसो २ बजे बस्ने गरी बैठक बोलाएका छन् ।
सोमबार केन्द्रीय कार्यसमिति बैठक बस्नुअघि सभापति देउवाले पदाधिकारी बैठक बोलाएका हुन् । पार्टी कार्यालय सानेपामा बस्ने बैठकमा १४औं महाधिवेशनका विषयमा छलफल हुने बताइएको छ ।
आगामी भदौ ७ गतेदेखि सुरु हुने महाधिवेशनको कार्यतालिका बनेपनि अहिलेसम्म क्रियाशील सदस्यता र नवीकरणको काम सकिएको छैन । ७१ जिल्लामा काम भैरहेको छ भने बाँकी जिल्लामा बल्ल सदस्यताको काम सुरु हुँदैछ ।
बैठकमा नयाँ सत्ता समीकरणका विषयमा समेत छलफल हुने बताइएको छ । कांग्रेसले आफ्नो नेतृत्वमा सरकार बनाउन पहल गरिरहेको छ । शुक्रबार सभापति देउवाले माओवादी केन्द्र र जनता समाजवादी पार्टीसँग छलफल गरेको थियो ।
माओवादी केन्द्रले तत्कालै समर्थन जनाए पनि जसपाले भने पार्टीमा छलफल गर्नुपर्ने भन्दै केही समय माग गरेको थियो ।
प्रतिक्रिया