सिरहा । व्यापक अनियमिमता भएको जनाउँदै वडाध्यक्ष तथा कार्यपालिका सदस्यले सिरहाको कल्याणपुर नगरपालिकामा विगत ५ दिनदेखि गरेको तालाबन्दी अझै नखुल्दा सेवाग्राही मारमा परेका छन् ।
लामो समयदेखि नगरपालिकामा गरिएको तालाबन्दीका कारण सेवाग्राही मात्र नभई नगर क्षेत्रभित्रकै सम्पूर्ण कामकाज ठप्प हुँदा स्थानीय चिन्तित बनेका हुन् ।
तालाबन्दीका कारण नगरपालिकाबाट सञ्चालित योजनाको काम प्रभावित हुनुका साथै काम विशेषले आउने सेवाग्राही रित्तै फर्किन बाध्य भएका छन् ।
नगरपालिकाका कार्यवाहक नगर प्रमुख र प्रमुख प्रशासकीय अधिकृतको मिलेमतोमा व्यापक अनियमिता भएको भन्दै वडाध्यक्ष तथा कार्यपालिका सदस्यले गत चैत ३१ गते नगरपालिकामा तालाबन्दी गरेका थिए ।
नगर सभाले पारित गरेको योजना समेत कार्यपालिका बैठक विनै आफ्नै मनोमानी तरिकाले परिवर्तन गरी कार्यबाहक नगर प्रमुख रोहिणीकुमारी यादव र प्रमुख प्रशासकीय अधिकृत जयप्रसाद दासको मिलेमतोमा व्यापक अनियमितता भएकाले तालाबन्दी गरिएको वडाध्यक्षले बताए ।
कल्याणपुर नगरपालिकाका ९ जना वडाध्यक्ष तथा ८ जना कार्यपालिका सदस्यले सामूहिकरूपमा ११ सूत्रीय माग अघि सार्दै नगरपालिकामा तालाबन्दी गरेको वडा नम्बर ५ का वडाध्यक्ष दीपेन्द्र यादवले जानकारी दिए ।
चालू आर्थिक वर्षमा हालसम्म सामाजिक सुरक्षा, बालपोषण लगायतका भुक्तानी गर्न नसकेकाले आफूहरूलाई स्थानीयले पटक–पटक वडा कार्यालयमा गई विभिन्न किसिमको आरोप लगाइने गरेको र आफूहरूलाई वडा कार्यालय सञ्चालन गर्न समेत कठिनाइ भइरहकाले बाध्य भएर तालाबन्दी गर्नुपरेको कल्याणपुर नगरपालिका-१ का अध्यक्ष जयराम कामतीले बताए ।
कार्यबाहक नगर प्रमुख यादव र प्रमुख प्रशासकीय अधिकृत दासको मिलोमतोमा कार्यपालिकालाई जानकारी नदिई विभिन्न योजना कमिसनको खेलमा नजिकका आफन्तलाई जिम्मा दिई आफूखुशी सञ्चालन गरेको वडा नम्बर ५ का वडाध्यक्ष दीपेन्द्र यादवले आरोप लगाए । रासस
प्रतिक्रिया