बुटवल । लुम्बिनी प्रदेश सरकार विरुद्ध अविश्वासको प्रस्ताव दर्ता भएको छ ।
मुख्यमन्त्री शंकर पोखरेल सरकार विरुद्ध नेकपा माओवादी केन्द्र, नेपाली कांग्रेस र जनता समाजवादी पार्टीका सांसदहरुले सोमबार दिउँसो १ बजेर १५ मिनेटमा प्रदेशसभा सचिवालयमा अविश्वासको प्रस्ताव दर्ता गरेका हुन् ।
अविश्वास प्रस्ताव दर्तागरेसँगै नेकपा माओवादी केन्द्र पोखरेल सरकारबाट बाहिरिएको छ भने उसले सरकारलाई दिएको समर्थन समेत स्वतः फिर्ता भएको छ ।
अविश्वास प्रस्ताव दर्ता गर्दा नयाँ मुख्यमन्त्रीमा माओवादी केन्द्रका कुलप्रसाद केसीलाई प्रस्तावित गरिएको छ । केसी अहिलेको पोखरेल सरकारमा आन्तरिक मामिला मन्त्री रहेका छन् ।
४२ जना सांसदको हस्ताक्षरसहित प्रदेशसभामा अविश्वासको प्रस्ताव दर्ता गरिएको र संसदको विशेष अधिवेशन आह्वानका लागि समेत प्रदेश प्रुमुखलाई पत्र बुझाइएको नेकपा माओवादी केन्द्रका सांसद आईपी खरेलले खबरकुरालाई बताए ।
लुम्बिनी प्रदेशसभा ८७ सदस्यीय रहेको छ । जसमध्ये माओवादी केन्द्रका दुई सांसदले दल त्याग गरेपछि उनहरुको सांसद पद गुमेको छ । नयाँ सरकार गठन गर्न अब ४३ जना सांसद आवश्यक पर्दछ ।
प्रदेशसभामा सबैभन्दा ठूलो दल नेकपा एमालेका ४१ जना सांसद रहेका छन् । नेपाली कांग्रेसका १९ र माओवादी केन्द्रका १७ जना संसद छन् । यस्तै जनता समाजवादी पार्टीका ६ र राष्ट्रिय जनमोर्चाका एक सांसद रहेका छन् ।
प्रतिक्रिया