काठमाडौं । नेपाली कांग्रेसले प्रधानमन्त्री केपी शर्मा ओलीलाई सहयोग गर्न नसक्ने स्पष्ट पारेको छ ।
नेपाली कांग्रेसका नेताहरुलाई भेट्न सभापति शेरबहादुर देउवा निवासमा आफ्ना नेताहरुसहित पुगेका ओलीलाई कांग्रेस नेताहरुले सहयोग गर्न नसक्ने स्पष्ट पारेका हुन् ।
प्रधानमन्त्री ओलीले संसदको विशेष अधिवेशनमा विश्वासको मतमा सहयोग गर्न आग्रह गरेपछि कांग्रेसले सहयोग गर्न नसक्ने स्पष्ट पारेको हो । बैठकपछि संचारकर्मीहरुसँग कुरा गर्दै कांग्रेस नेता प्रकाशशरण महतले सरकारलाई अहिलेको अवस्थामा सहयोग गर्न नसक्ने कुरा बताएको जनाए । उनले भने, ‘हामीले ओलीजीलाई भन्यौं – तपाईंहरुले सत्तामा आएदेखि लोकतान्त्रिक मान्यतालाई कुल्चिनुभएको छ । संविधानलाई मिच्नुभएको छ । अहिले त त्यो काम झन बढेको छ । त्यसैले लोकतन्त्रप्रति व्यवहारिक रुपमा प्रतिवद्ध नभएसम्म, लोकतान्त्रिक संस्थाहरुलाई, संविधानलाई बलियो बनाउने दिशामा व्यहारिक प्रतिवद्धता नदेखिएसम्म हामीहरु तपाईंलाई सहयोग गर्न सक्दैनौं ।’
नेता महतले आफुहरुले संविधान र संसद छलेर संवैधानिक परिषदसम्बन्धी अध्यादेश र अन्य अध्यादेशहरु ल्याएकोमा पनि आपत्ति जनाएको बताए ।
प्रधानमन्त्री ओलीले लोकतन्त्रका लागि सँगै लडेका सहयात्री दलहरु एक हुनुपर्ने बताएका थिए । ओलीले कांग्रेस नेताहरुसँग आफुलाई विश्वासको मतमा सहयोग गर्न आग्रह गर्दै सहकार्य गरेर जान प्रस्ताव गरेका थिए ।
ओलीसँगै उपप्रधानमन्त्री एवं एमाले महासचिव ईश्वर पोखरेल, संसदीय दलका उपनेता सुवास नेम्वाङ, गृहमन्त्री रामबहादुर थापा र अर्थमन्त्री विष्णु पौडेल बुढानीलकण्ठ पुगेका थिए ।
बैठकमा कांग्रेसबाट सभापति देउवासँगै वरिष्ठ नेता रामचन्द्र पौडेल, उपसभापति विमलेन्द्र निधि, महामन्त्री डा. शशांक कोइराला, पुर्णबहादुर खड्का र सहमहामन्त्री प्रकाशशरण महत सहभागी भएका थिए ।
प्रतिक्रिया