बाँकेमा ३६५ संक्रमित थपिँदा ५११ जना डिस्चार्ज

नेपालगन्ज । बाँकेमा रहेका ३ प्रयोगशालाबाट पछिल्लो २४ घण्टामा ८०५ जनामा कोरोना संक्रमण पुष्टि भएको रिपोर्ट प्राप्त भएको छ । ती प्रयोगशालाहरुमा ११०७ नमुना परीक्षण गर्दा ८०५ जनामा कोरोना संक्रमण पुष्टि भएको हो । आज पुष्टि भएको संक्रमितहरुमा बाँके जिल्ला भित्रका भन्दा जिल्ला बाहिरका बढी छन् । बाँके जिल्लाका ३६५ जनामा मात्र कोरोना संक्रमण पुष्टि भएको डीसीसीएमसी बाँकेले जनाएको छ ।

डीसीसीएमसी बाँकेका अनुसार भेरी अस्पतालको प्रयोगशालामा ७८० नमुना परीक्षण गर्दा ६२२ जनामा संक्रमण पुष्टि भएको छ भने नेपालगन्ज मेडिकल कलेज ल्यावमा १४७ मा ८३ जना र बागेश्वरी डाइग्नोशिस ल्यावमा १८० नुमना परीक्षण गर्दा १०० जनामा संक्रमण पुष्टि भएको छ ।

२४ घण्टाकै अवधीमा बाँकेमा ११ जनाले ज्यान गुमाएका छन् भने सोही अवधीमा ५११ जना कोरोना मुक्त भएर डिस्चार्ज भएका छन् । बाँकेमा आज सम्ममा जिल्ला भित्रका २३७ र बाहिरी जिल्लाबाट उपचार गर्न आएका मध्यबाट १८४ कोरोना संक्रमितको मृत्यु भएको छ ।