नेपालगन्ज । बाँकेमा जारी निषेधाज्ञा एकसाताका लागि थप गरिएको छ । डीसीसीएमसी बाँकेको सिफारिसमा बाँकेका प्रमुख जिल्ला अधिकारी शिवलाल गेलालले १० गते मध्यराती १२ बजे सम्म कायम हुने गरि निषेधाज्ञा थप गरेका हुन् ।
गत बैशाख १३ गतेबाट जारी निषेधाज्ञाबाट पनि संक्रमण थपिने क्रम नरोकिएकाले निषेधाज्ञाको अवधी थप्नु परेको प्रमुख जिल्ला अधिकारी गुलालले जारी आदेशमा उल्लेख गरिएको छ ।
आज निषेधाज्ञा थप भएसँगै नेपालगन्जका बिभिन्न चौकहरुमा नेपाली सेना र शसस्त्र प्रहरीलाई तैनाथ गरिएको छ । प्रशासनको सुचनामा सेना परिचालन सम्बन्धी कुनै जानकारी नगराईएपनि सडकमा सेनाको उपस्थिती देखिएको छ । नेपालगन्ज र यस आसपासमा निषेधाज्ञाको ब्यापक उल्लंघन भएपछि स्थानीय नागरिक समाजबाटै सेना परिचारलनको माग हुँदै आएको थियो ।
शसस्त्र र नेपाली सेनाको नियमित गस्ती बाहेक सेना परिचालन नगरिएको बाँकेका प्रमुख जिल्ला अधिकारी गेलालले बताए । चेन ब्रेक अझै हुन नसकेका कारण आज देखिको निषेधाज्ञालाई कडा बनाईने भने उनले जानकारी दिए । ‘निषेधाज्ञा सशक्त हुन्छ, कसैसँग मोलाहिजा हुने छैन ।’ उनले भने, ‘अवज्ञा गर्नेलाई छुट नदिई कानुनी कारवाही हुनेछ ।’
कोरोना महामारीको दोस्रो लहरसँगै बाँकेमा भेरी अस्पतालमा १५३ जना र नेपालगन्ज मेडिकल कलेजमा ५१ जनाले कोरोना संक्रमणका कारण ज्यान गुमाइसकेका छन् ।
प्रतिक्रिया