काठमाडौं । नेकपा एमालेको विवाद समाधानका लागि बनेको कार्यदलको बैठक बस्दैछ ।
सिंहदरबारमा दिउँसो ३ बजे बस्ने कार्यदल बैठकमा पार्टीलाई २०७५ जेठ २ गतेको पार्टी संरचना विधान र नेतृत्वको अवस्थामा फर्काउने विषयमा छलफल हुने बताइएको छ ।
पार्टी फुटको अवस्थामा पुगेपछि अध्यक्ष एवं प्रधानमन्त्री केपी शर्मा ओली र वरिष्ठ नेता माधवकुमार नेपालबीच कार्यदल बनाउने सहमति भएको थियो । सोही सहमति अनुसार ओली र नेपाल पक्षबाट पाँच पाँच जना रहेको कार्यदल गठन गरिएको थियो । कार्यदलमा ओलीपक्षबाट सुवास नेम्वाङ, विष्णु पौडेल, प्रदीप ज्ञवाली, शंकर पोखरेल र विष्णु रिमाल रहेका छन् । यस्तै नेपाल पक्षबाट भीम रावल, घनश्याम भुसाल, गोकर्ण विष्ट, सुरेन्द्र पाण्डे र रघु पन्त रहेका छन् ।
आगामी बिहीबारसम्म कार्यदलले सुझाव दिने भनिएपनि कार्यदलको बैठक बल्ल पहिलो पटक बस्न लागेको छ । कार्यदलले दिएको सुझावका आधारमा शिर्ष नेतृत्वले पार्टीको संगठनात्मक संरचनालाई व्यवस्थित गर्ने बताइएको छ ।
सर्वोच्च अदालतले नेकपा खारेज गरेर एमाले ब्युँताइदिएपछि गत फागुन २८ गते अध्यक्ष ओलीले एकलौटी निर्णय गर्दै नेपाल पक्षका नेताहरुको जिम्मेवारी खोस्दै कारवाही अघि बढाएपछि पार्टीभित्र चरम विवाद उत्पन्न भएको थियो । तर, ओलीले प्रधानमन्त्रीमा विश्वासको मत लिने बेलामा नेपाल पक्षीय सांसदहरुले सामुहिक राजीनामाको धम्की दिएपछि ओली र नेपालबीच विभिन्न चरणका छलफल भएपछि ३१ बैशाखमा कार्यदल बनाउने सहमति भएको थियो ।
प्रतिक्रिया