राष्ट्रियसभा उपनिर्वाचनको मतदान जारी, साँझ ५ बजेबाट मतगणना, आजै नतिजा आउने

हेटौंडा । बागमती प्रदेशमा रिक्त राष्ट्रियसभाको एक सदस्यका लागि उपनिर्वाचन सुरु भएको छ ।

हेटौंडाको भुटनदेवी माध्यमिक विद्यालयमा बिहान ९ बजेबाट मतदान सुरु भएको हो । मतदान दिउँसो ३ बजे जारी रहनेछ ।

मतदान सकिएपछि साँझ ५ बजेबाट मतगणना हुने र आजै नतिजा प्रकाशित गरिने निर्वाचन कार्यालयले जनाएको छ । नतिजा भर्चुअल माध्यमबाट प्रकाशित गर्ने योजना रहेको कार्यालयले जनाएको छ ।

यो उपनिर्वाचनमा एमाले नेता एवं गृहमन्त्री रामबहादुर थापा र स्वतन्त्र उम्मेदवार डा. खिमलाल देवकोटाबीच मुख्य प्रतिस्पर्धा हुँदैछ । नेपाल मजदुर किसान पार्टीका कृष्ण तामाङ पनि उम्मेदवार रहेका छन् ।

स्वतन्त्र उम्मेदवार डा. देवकोटालाई माओवादी केन्द्र, नेपाली कांग्रेस, जनता समाजवादी पार्टी र एमालेको माधवकुमार नेपाल पक्षले समर्थन गरेको छ । देवकोटा एमालेको नेपाल पक्षकै आग्रहमा उम्मेदवार बनेका देवकोटालाई माओवादी र कांग्रेस र जसपाले समर्थन गरेका हुन् ।

मतदान स्थलमा उम्मेदवार थापा, देवकोटा र तामाङले अवलोकन गरेका छन् । यो मतदानमा बागमती प्रदेशसभाका सांसदहरु एवं बागमती प्रदेशअन्तर्गत सबै स्थानीय तहका प्रमुख उपप्रमुखहरुले भोट हाल्न पाउँछन् ।

प्रदेशसभामा ११० जना सांसदहरु रहेका छन् । तर केहीदिनअघि एमाले सांसद पशुपति चौलागाईंको मृत्यु भएको छ । यस्तै स्थानीय तहका ३४८ जना प्रमुख उपप्रमुखहरु रहेका छन् ।

तर विवेकशील साझाले भने मतदानमा भाग नलिने भएको छ । यो पार्टीका ३ जना प्रदेशसभा सदस्य रहेका छन् ।