दाङ । लुम्बिनी प्रदेशमा रिक्त राष्ट्रियसभाको एक सदस्यका लागि उपचुनावमा मतदान जारी छ ।
दाङको घोराहीस्थित कर्मचारी मिलन केन्द्रमा तोकिएका ३ वटा मतदानस्थलमा बिहान ९ बजेबाट मतदान भएको हो ।
लुम्बिनी प्रदेशका मुख्यमन्त्री शंकर पोखरेलले पहिलो मतदान गरेका छन्।
दिउँसो ३ बजेसम्म मतदान हुनेछ । कोरोना महामारीका कारण भीडभाड नगरी मतदान गर्ने व्यवस्था मिलाइएको छ ।
उपचुनावमा दुई जना उम्मेदवार मैदानमा रहेका छन् । काँग्रेस, माओवादी केन्द्र, जनता समाजवादी पार्टी र राष्ट्रिय जनमोर्चाको विपक्षी गठबन्धनका तर्फबाट दृगनारायण पाण्डे र एमालेका तर्फबाट चन्द्रबहादुर खड्का उम्मेदवार रहेका छन् ।
दिउँसो ३ बजे मतदान सकिएपछि सर्वदलीय बैठक बसेर तत्कालै मतगणना सुरु हुने मुख्य निर्वाचन अधिकृत रीतेन्द्र थापाले जानकारी दिएका छन् ।
आजको निर्वाचनमा कुल मतदाता ३ सय रहेका छन्। जसमा प्रदेश सांसदको संख्या ८३ रहेको छ भने स्थानीय तहका प्रमुख/उपप्रमुख र अध्यक्ष/उपाध्यक्ष गरी २१७ मतदाता रहेका छन् । प्रदेशसभाको कुल मतभार ३९८४ रहेको छ भने स्थानीय तहको कुल मतभार ३९०६ रहेको छ । उपनिर्वाचनमा प्रदेशसभा सदस्यको ४८ र स्थानीय तहका प्रतिनिधिको १८ मतभार गणना हुने व्यवस्था छ।
निर्वाचन आयोगले जसपाका चार प्रदेश सांसद सन्तोष कुमार पाण्डे, विजयबहादुर यादव, सुमन शर्मा रायमाझी र कल्पना पाण्डेले मतदान गर्न पाउने भएपछि प्रदेश सांसदको संख्या ८३ पुगेको छ। विपक्षी दलहरुले निर्वाचन आयोगले प्रधानमन्त्री केपी ओलीको छायाँमा परेर अन्तिम समयमा मतदाता संख्या बढाएको आरोप लगाएका छन् ।
कुल मतभारको ५० प्रतिशत कटाउने उम्मेदवार विजयी घोषित हुनेछन् ।
प्रतिक्रिया