काठमाडौं । नेकपा एमालेको स्थायी कमिटी बैठक बस्दै छ । यसअघि दुई पटकसम्म स्थगित भएको बैठक आज बिहान ११ बजे प्रधानमन्त्री निवास बालुवाटारमा बस्न लागेको हो ।
आजको बैठकमा आर्थिक वर्ष २०७८/७९ को बजेटको समीक्षा, स्पष्टीकरण सोधिएका पार्टीबाट निष्काशित माधव नेपाल पक्षका १२ जना सांसदहरूको जवाफ र कारबाहीका विषयमा छलफल हुने कार्यसूचि छ ।
सुरेन्द्र पाण्डे, घनश्याम भुसाल, सोमप्रसाद पाण्डे, विरोध खतिवडा, जीवनराम श्रेष्ठ, कृष्णलाल महर्जन, झपट रावल, भवानीप्रसाद खापुङ, यज्ञ सुनुवार, मेटमणि चौधरी, दीपकप्रकाश भट्ट र नारायण खतिवडालाई स्पष्टीकरण पत्र पठाइएको थियो । तर, उनीहरूले कुनै जवाफ दिएका छैनन् । यसअघि नै माधव नेपाल, भीम रावल नेताहरुलाई एमालेको साधारण सदस्य समेत नरहने गरी पार्टीबाट निष्कासन गरिसकेको छ ।
हाल भएको २ वटा राष्ट्रियसभा सदस्यको उपनिर्वाचनमा एमाले पराजित भएको छ । त्यसमा नेपाल पक्षले विपक्षी उम्मेदवारलाई मतदान गरेका कारण पराजय भएको निष्कर्ष एमालेको छ ।
यसैबिच सोमबार राति अबेरसम्म याक एन्ड यति होटलमा एमालेका दोस्रो तहका नेताले पार्टीमा एकता कायम गर्ने प्रयासमा छलफल गरेका थिए ।
भेटवार्तामा अध्यक्ष केपी शर्मा ओली पक्षबाट सुवास नेम्वाङ, विष्णु पौडेल र प्रदीप ज्ञवाली तथा नेपाल पक्षबाट नेता पाण्डेसहित घनश्याम भुसाल, योगेश भट्टराई र गोकर्ण विष्ट सहभागी भएका थिए ।
आज बस्ने स्थायी कमिटी बैठकले १२ नेताहरुलाई समेत कारवाही गर्ने संस्थापन पक्षको तयारी थियो । वार्ता सकारारात्मक भएको भन्दै एक नेताले नेताहरुमाथिको कारवाही रोकिनसक्ने बताए ।
दुई दिनसम्म स्थायी कमिटी बैठक स्थगित हुँदै आएका छन् । दोस्रो वरियताका नेताहरुकै आग्रहमा दुई दिन बैठक स्थगित भएको बुझिएको छ ।
माधव नेपाल पक्षमा लागेका दोस्रो वरियताका नेताहरु पनि एमालेबाट आफूहरुलाई नहटाओस भन्ने पक्षमा देखिएकाले पनि बैठक स्थगित हुँदै आएको एक स्थायी कमिटी सदस्यले बताए ।
प्रतिक्रिया