काठमाडौं । जनता समाजवादी पार्टी जसपाका एक अध्यक्ष महन्थ ठाकुरले सर्वोच्च अदालतले नागरिकता अध्यादेश रोक्नु गलत भएको बताएका छन् ।
उद्योग, वाणिज्य तथा आपूर्ति मन्त्रीमा नियुक्त मन्त्री राजकिशोर यादवको सम्मानमा आयोजित कार्यक्रमलाई सम्बोधन गर्दै अध्यक्ष ठाकुरले अध्यादेश रोक्न अदालतबाट आएको आदेशले आफुहरु दुखित भएको बताएका छन् । ठाकुरले अध्यादेश पनि कानुन नै भएकाले सर्वोच्च अदालतले रोक्नु गलत भएको जिकिर गरे । उनले नागरिकता सम्बन्धी अध्यादेश रोक्दा नागरिकतासम्बन्धी समस्या थप भयावह हुने बताए ।
बिहीबार सर्वोच्च अदालतले नागरिकता सम्बन्धी अध्यादेश जारी गरेको विरुद्दमा परेको रिटमा सुनुवाई गर्दै तत्काल कार्यान्वयन नगर्नु भनेर अन्तरिम आदेश दिएको थियो ।
नागरिकता अध्यादेश लगायतका माग सम्बोधन हुनेभएपछि पार्टी फुटकै अवस्थामा भएपनि प्रधानमन्त्री ओलीलाई समर्थन गरेका ठाकुरले ३ वर्षदेखि नागरिकतासम्बन्धी विधेयक संसदमा अड्किएको उल्लेख गर्दै संसदले नागरिकताबारे कुनै निर्णय गर्न नसकेको आरोप समेत लगाए । उनले नागरिकताको अभावमा नागरिकहरु रोजगार, शिक्षा, व्यापार व्यवसाय, वैदेशिक रोजगार लगायतका राज्यको सेवा सुविधाबाट वञ्चित हुनुपरेको गुनासो गरे ।
ठाकुरले आपसमा समन्वय गरेर काम गर्न नवनियुक्त मन्त्री यादवसहित अन्य मन्त्रीहरुलाई समेत निर्देशन दिए । त्यसअवसरमा उपप्रधानमन्त्री एवं शहरी विकासमन्त्री राजेन्द्र महताले देश र जनताप्रति समर्पित भएर काम गर्र्नुपर्ने बताए ।
मन्त्री राजकिशोर यादवले आफ्नो विवेक र ल्याकतले भ्याएसम्म पार्टीको नीति, निर्देशन र उद्धेश्य प्राप्त गर्न केन्द्रित हुनेगरी काम गर्ने प्रतिवद्धता जनाए ।
प्रतिक्रिया