एमाले कार्यदलले आजपनि निकास दिन सकेन, ओली पक्षले विचाराधीन मुद्दालाई प्रभावित पार्न सहमति खोजेको नेपाल पक्षको आरोप

काठमाडौं । विगत चार दिनदेखि सहमति नजिक पुग्नै लागेको भन्दै बस्दै गरेको एमाले कार्यदलको बैठकले आज पनि सहमतिको ठोस निष्कर्ष निकाल्न सकेन । अर्को बैठकबाट ठोस निष्कर्ष निस्कन्छ भन्दै बैठक बस्दै गरेको कार्यदलका सदस्यहरु आजको बैठकबाट बाहिरिँदै गर्दा १० दिन अगाडि जहाँ रोकिएको थियो त्यहिँ सम्वाद अड्किएको प्रतिक्रिया दिएका छन् ।

बुधबार पार्टी अध्यक्ष केपी शर्मा ओली र वरिष्ठ नेता माधवकुमार नेपालबीच भेटवार्ता भएको भोलिपल्ट बिहीबार विहान बसेको बैठकपछि आवश्यक गृहकार्य गरेर आज साँझ सम्म सहमतिको बिन्दु पहिल्याउने दाबी कार्यदलका सदस्यहरुले गरेका थिए ।

बिहीबार साँझ ७ बजे निकास निकाल्ने गरि बैठक गर्ने गरि आजै बिहान भएको कार्यदलको निर्णयलाई लत्याउँदै आज साँझ बसेको बैठकमा अर्थमन्त्री विष्णु पौडेल अनुपस्थित भएको नेपाल पक्षका एकजना कार्यदलका सदस्यले बताए । ‘अर्थ मन्त्रालयमा कार्यदलको बैठक पनि बोलाइएको थियो । तर बैठकमा कार्यदलका सदस्य एवं उपमहासचिव विष्णु पौडेल अनुपस्थित रहे ।’ उनले भने ।

बैठकबाट बाहिरिँदै कार्यदलमा नेपाल पक्षका सदस्य घनश्याम भुसालले अनौपचारिक छलफल गरेर १० दिन अगाडि जुन एजेण्डाहरु तय गरिएको थियो त्यसमा कुनै प्रगति नभएको बताए । ‘गएको १० दिनदेखि हामीले विभिन्न कारणले खास, ठोस, मूर्त योगदान गर्न सकेका छैनौं ।’ उनले भने ।

नेपालपक्षका नेताहरुले ओली पक्षले कार्यदलमा कुनै एजेन्डा नै प्रस्तुत गर्न नसकेको आरोप लगाएका छन् । ओली पक्षले सर्वोच्च अदालतमा विचाराधीन मुद्दालाई प्रभावित पार्न र पाँच दलीय गठबन्धनमा अविश्वास सिर्जना गर्न मात्र सहमति खोजेजस्तो गरेको नेपाल पक्षका नेताहरुको आशंका गरेका छन् ।