काठमाडौं । पार्टीभित्रको विवाद समाधानका लागि गठित नेकपा एमालेको कार्यदल बैठक सिंहदरबारमा जारी छ । निर्धारित समय भन्दा दुई घण्टा ढिलो गरी बैठक बसेको हो ।
बैठक सुरु हुनुअघि कार्यदलमा माधव नेपाल पक्षका नेताहरु कोटेश्वर पुगेर नेता नेपालसँग भेट गरेका छन् । अन्तिम सहमतिको ड्राफ्टमा छलफल गर्नुअघि नेपाल पक्षका नेताहरुले परामर्श गरेका हुन् ।
बैठकमा ओली पक्षका कार्यदल सदस्य शंकर पोखरेल र नेपाल पक्षका सदस्य रघुजी पन्त अनुपस्थित छन् । तर, कार्यदलमा नरहेका नेपाल पक्षका भीम आचार्य सहभागी भएका छन् ।
नेपाल पक्षका नेताहरु कोटेश्वर पुग्दा ओली पक्षका नेताहरु भने सिंहदबारमै बसेका थिए ।
कार्यदलस्तरम झण्डै सहमतिमा पुगेका नेताहरुले पार्टीभित्र देखिएको विवाद मिलाउन अन्तिम सहमतिको खाका तयार भैरहेको बताएका छन् । शनिबार बिहानैदेखि कार्यदल सदस्यहरुबीच अनौपचारिक छलफल भएको थियो ।
शुक्रबार झण्डै सात घण्टा बसेको बैठकले धेरै विषयमा सहमति जुटाएका कारण आज शनिबार त्यसले सार्थकता पाउने नेताहरुले बताएका थिए ।
१० सदस्यीय कार्यदलमा अध्यक्ष ओली पक्षबाट सुवास नेम्वाङको नेतृत्वमा विष्णु पौडेल, प्रदीप ज्ञवाली, शंकर पोखरेल र विष्णु रिमाल छन् । यस्तै, नेता नेपालको पक्षबाट भीम रावलको नेतृत्वमा घनश्याम भुसाल, गोकर्ण विष्ट, सुरेन्द्र पाण्डे र रघुजी पन्त रहेका छन् ।
प्रतिक्रिया