काठमाडौं । पार्टीभित्रको विवाद समाधानका लागि गठन भएको नेकपा एमालेको कार्यदल शनिबार पनि विवादित विषयमा सहमतिमा पुग्न सकेन ।
सिंहदरबारमा निर्धारित समयभन्दा झण्डै दुई घण्टा ढिलो बसेको बैठक केही समयमै सकिएको छ । शुक्रबार मिल्न बाँकी विषय अब नभएको र सहमतिको दस्तावेजको भाषा सम्पदानको मात्र काम बाँकी रहेको बताएका नेताहरुले आज बिहानैदेखि अनौपचारिक छलफल गरे पनि औपचारिक छलफलमा सहमति निकाल्न सकेनन् ।
आजको बैठकमा मिल्न बाँकी रहेका केही विषयमा छलफल भएको नेपाल पक्षका कार्यदल सदस्य गोकर्ण विष्टले बताए । विष्टले पार्टीमा रहेको समस्या र त्यसलाई समाधान गर्ने विषयमा छलफल भएको बताउँदै भोलिसम्म सहमतिमा पुग्ने विश्वास व्यक्त गरे । विष्टले भने, ‘भोलि सार्थक निस्कर्षमा पुग्छौं ।’
कार्यदलको बैठक बस्नुअघि नेपाल पक्षका कार्यदल सदस्यहरुले कोटेश्वरमा वरिष्ठ नेता माधवकुमार नेपालसँग भेट गरेका थिए ।
१० सदस्यीय कार्यदलमा अध्यक्ष ओली पक्षबाट सुवास नेम्वाङको नेतृत्वमा विष्णु पौडेल, प्रदीप ज्ञवाली, शंकर पोखरेल र विष्णु रिमाल छन् । यस्तै, नेता नेपालको पक्षबाट भीम रावलको नेतृत्वमा घनश्याम भुसाल, गोकर्ण विष्ट, सुरेन्द्र पाण्डे र रघुजी पन्त रहेका छन् ।
प्रतिक्रिया