पूजाको प्रसाद खाँदा मेलम्चीमा २८ जना बिरामी

काठमाडौं । सिन्धुपाल्चोकको मेलम्ची नगरपालिका-११, चापाबोटमा पूजाको प्रसाद खाँदा २८ जना बिरामी भएका छन् ।

पूजामा सहभागीमध्ये २८ जनालाई एउटै प्रकारको झाडापखाला लागेको मेलम्ची नगरपालिकाका उपप्रमुख भगवती नेपालले बताइन् ।

सबैलाई अस्पताल ल्याउन सम्भव नभएकाले स्वास्थ्यकर्मीसहितको टोली घटनास्थलमै पुगरे उपचार गरेको उनले जानकारी दिइन् । गम्भीर बिरामी तीन जनालाई स्वास्थ्य केन्द्र मेलम्चीमा ल्याइएको उनले बताइन् ।

अन्य बिरामीको स्वास्थ्य अवस्था सामान्य रहेको जनाइएको छ । ‘फुडपोइजन’का कारण झाडापखाला लागेकाले ४८ घण्टासम्म सबै जना ठिक भइसक्ने स्वास्थ्यकर्मीको भनाइ छ ।