सिन्धुपाल्चोक । सिन्धुपाल्चोकको मेलम्ची खोलाको मुहान क्षेत्रमा पहिरो खस्ने क्रम नरोकिएपछि मेलम्ची आसपासका क्षेत्रका स्थानीयलाई ‘हाइअलर्ट’मा राखिएको छ । लेदो सहितको पानी बग्ने र नदीको दाँयाबाँयाबाट पहिरो खस्ने क्रम निरन्तर जारी रहेको सिन्धुपाल्चोक प्रहरीले जनाएको छ ।
मेलम्चीको मुहान क्षेत्रमा वर्षा नरोकिएको र डाँडा खस्ने क्रम पनि नरोकिएकोले जोखिम अझै बढ्दै गएको सिन्धुपाल्चोक प्रहरी प्रवक्ता प्रहरी नायव उपरिक्षक दक्ष बस्नेतले बताए । ‘कतिबेला के हुने हो, भन्न सकिने अवस्था छैन ।’ उद्दारमा खटिएका डीएसपी बस्नेतले भने, -‘डाँडाबाट पहिरो खसिरहेको छ। मेलम्ची मुहानमा लेदो भीमथाङबाट बगिरहेको छ।’ मेलम्ची करिडोरका क्षेत्रमा जोखिम कायमै रहेको उनले बताए ।
जोखिम कायम रहँदा सम्म मेलम्ची करिडोरका बासिन्दालाई तत्काल अन्यत्र सुरक्षित ठाउँमा सार्नुपर्ने स्थानीयबासीले माग गरेका छन् ।
प्रतिक्रिया