जनकपुरधाम । प्रदेश २ प्रदेशसभामा रहेका नेकपा एमालेका थप दुई जना सांसद एकीकृत समाजवादीमा खुलेका छन् ।
एमाले सांसदद्वय सुन्दरबहादुर विश्वकर्मा र सीता गुरुङले आज एकीकृत समाजवादी रोजको सनाखत गरेका छन् । विश्वकर्मा एमाले संसदीय दलका प्रमुख सचेतक समेत हुन् । दुवै जना सांसदहरु गत बिहीबार वीरगन्जमा आयोजित एमालेको प्रदेश कमिटी बैठकमा सहभागी भएका थिए ।
बिहीबार नै सनाखत गर्ने भनिएपनि उनीहरु मुल पार्टीकै कार्यक्रममा सहभागी भएपछि एकीकृत समाजवादीमा नजाने अनुमान गरिएको थियो । त्यतिबेला उनीहरुले मौसम खराब भएका कारण आफुहरु सनाखत गर्न आउन नसकेको बताएका थिए ।
प्रदेशसभामा एमालेका २१ जना सांसदहरु रहेका मध्ये १२ जनाले एकीकृत समाजवादीको पक्षमा सनाखत गरिसकेका छन् । भारतको नयाँ दिल्लीमा उपचार गराइरहेका अर्का एक जना सांसद डिल्ली उप्रेतीले पनि नेपाली दूतावासमार्फत सनाखत गराउने बताएका छन् । उप्रेतीसमेत गरेर १३ जना सांसद एकीकृत समाजवादीमा प्रवेश गर्दा एमाले सांसदको संख्या ८ मा झर्ने भएको छ ।
यसअघि, शत्रुधन महतो, प्रमोद यादव, गोविन्दबहादुर न्यौपाने, मन्जु यादव, हसिमा खातुन, अशोक यादव, मदनसेन श्रीवास्तव, बेची लुंगेली, रवीन्द्र बैठा, नागेन्द्र यादवले गत बिहीबार नै एकीकृत समाजवादी रोजेको सनाखत गराइसकेका छन् ।
प्रतिक्रिया