सभामुख विरुद्ध एमाले अध्यक्ष ओलीले दायर गरेको रिट न्यायाधीसद्वय कार्की र खड्काको इजलासमा

एमालेद्वारा ‘निस्काशित’ १४ सांसदको भविष्य निर्धारण हुने
खबर कुरा
२८ भाद्र २०७८, सोमबार
                 

काठमाडौं । नेकपा एमालेका अध्यक्ष केपी शर्मा ओलीले दायर गरेको रिटको सुनुवाइ सर्वोच्च अदालतका न्यायाधीसद्वय दीपककुमार कार्की र मीरा खड्काको इजलासमा हुनेभएको छ ।

पार्टीले कारवाही गरेको १४ जना सांसदलाई पदमुक्त नगरेको भन्दै अध्यक्ष ओलीले वारेसमार्फत सभामुख अग्निप्रसाद सापकोटा विरुद्ध मुद्दा दायर गरेका थिए । रिटमा ओलीले सभामुखले गैरकानूनी काम गरेको आरोप लगाएका थिए ।

पार्टीबाट निस्काशित व्यक्ति र सांसदको सनाखत गराएर नयाँ दल दर्ता गराएको भन्दै ओलीले निर्वाचन आयोग र नेकपा (एकीकृत समाजवादी)लाई समेत विपक्षी बनाएर दायर गरेको रिटमा अन्तरिम आदेश दिने कि नदिने भन्नेबारे आज सुनुवाइ हुन लागेको हो ।

ओलीको पक्षमा अन्तरिम आदेश जारी भएमा माधव नेपालसहितका सांसदको पद गुम्नेछ भने अन्तरिम आदेश जारी नभएमा एमालेले संसदमा गर्दै आएको अवरोध औचित्यहीन बन्नेछ ।

एमालेका तत्कालिन वरिष्ठ नेता माधवकुमार नेपालसहित १४ जना सांसदसमेतले नयाँ दल नेकपा एकीकृत समाजवादी दर्ता गरेका छन् । निर्वाचन आयोगले दल दर्ता गरिसकेको छ ।

सभामुख सापकोटाले आफ्नो पार्टी फुटाउने मतियार बनेको आरोप लगाउँदै एमालेले संसदको चालु अधिवेशन निरन्तर अवरुद्ध गर्दै आएको छ । सभामुख सापकोटाले भने अदालतमा विचाराधीन मुद्दामाथि संसदमा बहस गर्न नसकिने बताउँदै आएका छन् । निरन्तर संसद अवरुद्ध भैरहेपछि सभामुख सापकोटाकै पहलमा आज दिउँसो साढे २ बजे सर्वदलीय बैठक बस्दैछ । यद्यपी सो बैठकमा एमाले अध्यक्ष ओली सहभागी नहुने भएका छन् ।

 

यसमा तपाइको मत

Your email address will not be published. Required fields are marked *


*