झापा । नेकपा एमालेका अध्यक्ष केपी शर्मा ओलीले माधव नेपालले अब वडा सदस्य पनि नजित्ने दाबी गरेका छन् ।
झापा जिल्ला कमिटीले विर्तामोडमा आयोजना गरेको अगुवा कार्यकर्ता भेलालाई सम्बोधन गर्दै अध्यक्ष ओलीले माधव नेपालले एमालेमा बसेर खानुसम्म खाए पनि अब वडा सदस्य नजित्ने दाबी गरेका हुन् । ओलीले प्रचण्डको पार्टीले वडा अध्यक्ष पनि नजित्ने बताउँदै माधव नेपालको पार्टीले त वडा सदस्य पनि नजित्ने दाबी गरे ।
माधव नेपालले नयाँ पार्टी चलाउनका लागि नभै एमाले कमजोर पार्न पार्टी फुटाए पनि उनको इच्छा पुरा नहुने ओलीले दाबी गरे । पार्टी र सरकार चलाउन नसक्ने मान्छेले नयाँ पार्टी बनाउँछु भन्नु हास्यास्पद भएको उनले टिप्पणी गरे । ‘१६ वर्षसम्म एमालेको नेतृत्व गरेर खानु खाएपछि पार्टीलाई रसातलमा पुर्याएर नेपाल आफैं राजीनामा गरेर हिँडेको उनले आरोप लगाए ।
‘पार्टी र सरकार चलाउन नसकेर भाग्ने अनि फेरि त्यही पद चाहियो भनेर पार्टीमा रडाको मच्चाउने’, ओलीले आक्रोश पोखे ‘यो पार्टीको १६ वर्षसम्म महासचिव भए, विपक्षी दलको नेता भएर खाए, हामीले प्रधानमन्त्री बनाइदियौं । खानु खाएपछि २४० सिटमा जम्मा ३३ सिटमा झारेर मैले पार्टी चलाउन सकिन महासचिवबाट आफैं राजीनामा गरेर हिँडे । त्यसपछि त चुप लाग्नु पर्दैन ? फेरि दुःख दिन थाले अध्यक्ष चाहियो भनेर ।’
प्रतिक्रिया