काठमाडौंको मीनभवनमा एकीकृत समाजवादीको केन्द्रीय कार्यालय उद्घाटन

काठमाडौं । नेकपा एकीकृत समाजवादीको केन्द्रीय कार्यालयको उद्घाटन गरिएको छ ।

पार्टी अध्यक्ष माधवकुमार नेपालले शुक्रबार बिहान काठमाडौंको मीनभवनस्थित कार्यालयको रिबन काटेर उद्घाटन गरेका छन् ।

पार्टी कार्यालय उद्घाटन गर्दै अध्यक्ष नेपालले राष्ट्र र जनतालाई केन्द्रमा राखेर पार्टीका गतिविधिको केन्द्रमा रहने बताए। उनले सबै शक्तिसँग हातेमालो गर्दै अघि बढ्ने बताए । नेपालले पाँच दलीय गठबन्धनलाई चुनावसम्म लैजाने बताए ।

निर्वाचन आयोगबाट गत भदौ ९ गते मान्यता पाएको एकीकृत समाजवादीले अहिलेसम्म केन्द्रीय कार्यालय खोलेको थिएन । अब पार्टीका सबै गतिविधि केन्द्रीय कार्यालयबाट संचालन हुने प्रचार विभाग प्रमुख जगन्नाथ खतिवडाले बताए । पार्टीले छिट्टै मुखपत्र, बुलेटिन प्रकाशन गर्ने र सामाजिक सञ्जाल संचालन गर्ने खतिवडाले जानकारी दिए ।

उद्घाटन कार्यक्रममा अध्यक्ष नेपालसहित नेताहरू बेदुराम भुसाल, राजेन्द्र पाण्डे, गंगा तुलाधरलगायत नेता कार्यकर्ताहरू उपस्थित थिए ।

पूजा थापा बस्नेतको नाममा रहेको पार्टी कार्यालय रहेको घर चार तल्लाको रहेको छ । जहाँ १२ वटा कोठा छन् । कार्यालयको मासिक भाडा ३ लाख रुपैयाँ रहेको नेता बेदुराम भुसालले जानकारी दिए ।