काठमाडौं । नेकपा एमालेको केन्द्रीय कमिटी बैठकले पार्टीका उपमहासचिव घनश्याम भुसालको ३ बुँदे फरक मतका बीच तीनवटा प्रतिवेदनहरुलाई पारित गरेको छ । शुक्रबारदेखि जारी बैठकको अन्तिम दिन आइतबार स्थायी कमिटीबाट पारित भएर आएका अध्यक्ष केपी शर्मा ओलीको राजनीतिक प्रतिवेदन, महासचिव ईश्वर पोखरेलको संगठनात्मक प्रस्ताव र उपमहासचिव विष्णु पौडेलको विधान संशोधन प्रस्ताव पारित गरेको हो ।
अध्यक्ष ओलीको राजनीतिक प्रतिवेदनमाथि उपमहासचिव घनश्याम भुसालले तीन बुँदे फरक मत राखेका छन् । आइतबार अध्यक्ष ओलीले आफ्नो प्रस्तावमाथि उठेका प्रश्नको जवाफ दिए लगत्तै भुसालले मौखिक रुपमा आफ्नो ३ बुँदे फरक मत राखेका थिए ।
भुसालले जनताको बहुदलिय जनवादबारे प्रतिवेदन अस्पष्ट भएको, संसद विघटनबारे पनि प्रस्ट दृष्टिकोण नभएको र समाजवादबारे पार्टी अलमलमा परेको भन्दै अध्यक्षको राजनीतिक प्रतिवेदनमाथि फरक मत राखेका थिए ।
यद्देपी बैठकमा आएका सुझावहरुलाई समावेश गर्ने गरी ती दस्तावेज पारित भएको छ । भुसालको फरकमत प्रतिवेदनमा समावेश गर्ने वा फरक मतका साथ महाधिवेशनमा जाने बारे बैठकले केही निर्णय नगरेको बैठकमा सहभागी एक केन्द्रीय सदस्यले बताए । आजको बैठकमा ओली, पोरखेल र पौडेलले समुहगत छलफलबाट उठेको प्रश्नहरुको जवाफ दिएका थिए ।
प्रतिवेदनहरुमाथि छलफल गर्नका लागि केन्द्रीय कमिटीको बैठकमा शुक्रबार नै १० वटा समूह बनाइएको थियो । समूहमा गरिएको छलफलका निष्कर्षहरुलाई शनिबारको बैठकमा समूह नेताले प्रस्तुत गरेका थिए ।
प्रतिक्रिया