काठमाडौं । राष्ट्रियसभा सदस्यको १९ रिक्त पदका लागि निर्वाचन सुरु भएको छ ।
देशका विभिन्न प्रदेशमा कायम रहेका आठ मतदानस्थल र १४ केन्द्रमा बिहान ९ देखि मतदान सुरु भएको हो । मतदान दिउँसो ३ बजेसम्म मतदान हुनेछ ।
निर्वाचन आयोगले निर्वाचनको नतिजा आजै सार्वजनिक गर्ने जनाएको छ । मतदान सकिएलगत्तै मतगणना सुरु गर्ने तयारीमा आयोग रहेको प्रवक्ता शर्मा पौडेलले बताए । कुनै अप्ठेरो अवस्था नआए मत परिणाम आजै रातिसम्म सार्वजनिक हुने उनले बताए ।
आगामी फागुन २० गते नेकपा (एमाले)का आठ, नेकपा (एकीकृत समाजवादी) का चार, नेकपा (माओवादी केन्द्र) का चार र नेपाली कांग्रेसका तीन राष्ट्रियसभा सदस्यको पदावधि सकिने भएकाले ती रिक्त स्थानका लागि निर्वाचन हुन लागेको हो ।
सदस्यको पदावधि समाप्त हुन ३५ दिनअघि नै निर्वाचन गर्नुपर्ने प्रावधान छ । नेपाली कांग्रेस, नेकपा (एमाले), नेकपा (माओवादी केन्द्र), नेकपा (एकीकृत समाजवादी), राष्ट्रिय जनमोर्चा, लोकतान्त्रिक समाजवादी पार्टी नेपाल, नेपाल मजदुर किसान पार्टी, जनता समाजवादी पार्टी नेपाल र राष्ट्रिय प्रजातन्त्र पार्टीका उम्मेदवार निर्वाचन प्रतिस्पर्धामा छन् ।
प्रतिक्रिया