काठमाडौं । प्रमुख प्रतिपक्षी दल नेकपा एमालेले जनसंगठन समन्वय संयन्त्रको बैठक बोलाएको छ । बैठक आज दिउँसो ३ बजे बस्ने नेकपा एमाले केन्द्रीय सदस्य तथा प्रचार विभाग उपप्रमुख विष्णु रिजालले जानकारी दिए ।
रिजालका अनुसार संयन्त्रमा विद्यार्थी, युवा, महिला लगायत २२ वटा संगठन रहेका छन् । संयन्त्रको संयोजक एमाले नेता भानुभक्त ढकाल रहेका छन् ।
‘स्थानीय निर्वाचन समयमै नगराउने आलटाल भइरहेको छ । एमाले यसको विरुद्धमा छ । यस विषयलाई जनसंगठनहरुले आआफ्नो ठाउबाट दबाव दिन पार्टी परिचालन गर्नेगरी निर्णय गर्नेछ, अर्को जनसंगठन सञ्चालन निर्देशिका पारित गर्ने कार्यक्रम छ’, रिजालले बताए ।
भक्तपुरको जर्मन हस्पिटालिटी होम्समा बस्ने बैठकमा २२ वटै जनसंगठनका इन्चार्ज, सहइन्चार्ज र अध्यक्षहरु सहभागी हुनेछन् । बैठकमा ५० जना भन्दा बढीको उपस्थिति रहनेछ ।
सरकारले २५ जना भन्दा बढीको संख्यामा भेला नहुन निर्देशन जारी गरेको भएपनि स्वास्थ्य मापदण्डको पालना गरेर बैठक बस्ने रिजालले बताए ।
प्रतिक्रिया