आइतबारका लागि बोलाइएको संसद्‍ बैठक फेरि पनि स्थगित

काठमाडौं । माघ १६ गते आइतबारका लागि बोलाइएको प्रतिनिधि सभा बैठक पुनः स्थगित भएको छ । दोस्रो पटक पनि कोभिड १९ संक्रमणको जोखिमलाई कारण देखाउँदै संसद बैठक माघ २६ गतेसम्मका लागि स्थगित भएको हो ।

शनिबार संसद्‍ सचिवालयले विज्ञप्ति जारी गर्दै लेखेको छ, ‘कोभिड १९ संक्रमणको जोखिम यथावत रहेको कारण उक्त दिन र समयमा बैठक बस्न नसक्ने भएकोले प्रतिनिधि सभा नियमावली, २०७५ को नियम ६ को उपनियम (३) बमोजिम सम्माननीय सभामुखज्यूले मिति २०७८ माघ २६ गते बुधबार दिनको १ बजे बैठक बस्ने गरी निर्धारण गर्नुभएको व्यहोरा माननीय सदस्यहरूको जानकारीको लागि यो सूचना प्रकाशित गरिएको छ ।’

पुस ७ गते यता प्रतिनिधिसभा बैठक बस्न सकेको छैन । सुरुमा माओवादी अधिवेन, त्यसपछि एकालेको बैठक र त्यस यता कोभिड १९ को कारण देखाउँदै बैठक स्थगित हुँदै आएको छ । पुस ७ अघि पनि एमालेको अवरोधका कारण बैठक लगातार अवरुद्ध हुँदै आएको थियो ।