काठमाडौं । स्थानीय तह निर्वाचन नजिकिएसँगै अघिल्लो निर्वाचन बहिस्कार गरेको नेत्रविक्रम चन्द ‘विप्लव’ नेतृत्वको नेकपाले पनि चुनावी अभ्यास सुरु गरेको छ । आगामी स्थानीयतहको निर्वाचन सम्बन्धमा छलफल गर्न ‘विप्लव’ नेतृत्वको नेकपाको केन्द्रीय समिति बैठक बसेको छ । कपिलवस्तुको शिवगढीमा आज (शुक्रबार) बैठक बसेर निर्वाचनका सम्बन्धमा निर्णय लिइने नेकपाका एक नेताले बताए ।
विप्लव निकट स्रोतका अनुसार बैशाख ३० गते हुने स्थानीय तह निर्वाचनलाई उपयोग वा बहिस्कार गर्ने भन्नेबारे बैठकले नीतिगत निर्णय गर्ने छ । यसपटकको निर्वाचनमा नेकपा चुनावमा जाने संकेत गरेको भएपनि एक्लै वा गठबन्धन भन्ने निर्णय भने सो पार्टीले गरेको छैन । गत २६ फागुनमा सम्पन्न भएको सचिवालय बैठकमै महासचिव विप्लवले चुनाव उपयोग गर्ने प्रस्ताव गरेका थिए ।
पाँच जना सदस्य रहेको सचिवालय बैठकमा विप्लवको प्रस्तावको प्रवक्ता खडक बहादुर विश्वकर्माले मात्र समर्थन गरेका थिए भने अर्का सदस्य धर्मेन्द्र वास्तोला र हेमन्तप्रकाश वली ‘सुदर्शन’ निर्वाचन उपयोगको विपक्षमा र सन्तोष बुढामगरले तटस्थ अभिमत व्यक्त गरेका थिए ।
चुनावमा जानुपर्नेमा विप्लव र विश्वकर्माको मत मिलेपनि दुई नेताहरुकाबीच पनि कोसँग मिलेर जाने भन्ने विषयमा मत नमिलेको स्रोतको दाबी छ । पछिल्लो समय विप्लवले माओवादी केन्द्रका प्रवक्ता कृष्ण बहादुर महरासंगको भेटलाई बाक्लो बनाएका छन् भने प्रवक्ता विश्वकर्मा एमालेसँग तालमेल गरेर जानुपर्ने पक्षमा देखिएका छन् ।
प्रतिक्रिया