काठमाडौं । इजरायलको तेल अभिभ सहरमा भएको गोलीकाण्डमा दुई जनाको मृत्यु भएको छ भने ९ जना घाइते भएका छन् । पछिल्लो दुई हप्तामा इजरायलमा भएको यो चौथो आक्रमण हो ।
गोलीबारी तेल अभिभ सहरको डिजेनगोफ स्ट्रिटमा भएको थियो, जुन सबैभन्दा व्यस्त ठाउँहरू मध्ये एक मानिन्छ। बार र रेष्टुरेन्ट भएको क्षेत्र भएकाले यहाँ मानिसको आवतजावत पनि उच्च छ । टाइम्स अफ इजरायलका अनुसार डिजेनगोफको बारमा एक व्यक्तिले गोली हानेका हुन् ।
सुरक्षा बलले अहिले आक्रमणकारीको खोजी गरिरहेको छ। इजरायलको आपतकालीन सेवाका प्रवक्ताले आक्रमणपछि कम्तीमा ९ जनालाई अस्पताल लगिएको र तीमध्ये ४ जना जीवन र मृत्युको लडाइँ लडिरहेको बताएका छन् ।
बिहीबार राति एक विज्ञप्ति जारी गर्दै इजरायली प्रधानमन्त्री नाफ्ताली बेनेटले आक्रमणमा मारिएकाहरूका परिवारप्रति समवेदना व्यक्त गरेका छन् । उनले आक्रमणमा संलग्नलाई खोज्ने कार्य जारी रहेको पनि बताएका छन् ।
उनले भनेका छन्,‘इजरायली सुरक्षा सेवा तेल अभिभमा यो रक्तपात गर्ने आतंककारीको खोजीमा छ। आतंकवादी जहाँ भए पनि हामी पुग्छौं र उसलाई प्रत्यक्ष वा अप्रत्यक्ष रूपमा सहयोग गर्ने सबैले ठूलो मूल्य चुकाउनु पर्नेछ ।’
प्रहरी अधिकारीहरुका अनुसार इजरायल प्रहरी, आर्मी स्पेशल फोर्स र शिन बेट इन्टेलिजेन्स सर्भिसका १००० भन्दा बढी सदस्यले आक्रमणकारीको खोजी गरिरहेका छन् । इजरायली सुरक्षा बलहरू हालैका आक्रमणहरूलाई ध्यानमा राख्दै उच्च सतर्कतामा छन् ।
गत महिनाको अन्त्यमा एक प्यालेस्टिनी बन्दुकधारीले तेल अभिभमा पाँच जनाको हत्या गरेको थियो । यसअघि तीन अरब–इजरायलीहरूले दुई आक्रमणमा ६ जनाको ज्यान लिएका थिए ।
यी घटनाहरू इजरायलको उत्तरमा हादेरा र दक्षिणमा बेर्शेबा सहरका हुन् । तर, सबै आक्रमणकारीलाई गोली हानी मारिएको थियो ।
प्रतिक्रिया