काठमाडौं । नेपाली कांग्रेसले प्रतिनिधिसभा र प्रदेशसभा निर्वाचनका लागि उम्मेदवार मनोनयनको औपचारिक पत्र पठाउने जिम्मा सभापति शेरबहादुर देउवालाई दिएको छ ।
पार्टी केन्द्रीय कार्यालय सानेपामा शनिबार बिहान बसेको केन्द्रीय कार्यसम्पादन समितिको बैठकले प्रत्यक्ष र समानुपातिक उम्मेदवारको मनोनयन पत्र पठाउने जिम्मा सभापति देउवालाई दिएको हो । मनोनयन पत्र पठाउनुअघि पार्टीका सम्बन्धित निकायबाट नाम प्रस्ताव हुनेछ । सोही प्रस्तावको आधारमा सभापति देउवाले मनोनयनको औपचारिक पत्र पठाउनेछन् ।
यसैगरी बैठकले निर्वाचनका लागि दल दर्ताको जिम्मा कार्यालयका मुख्यसचिव कृष्णप्रसाद पौडेललाई दिएको छ । बैठकपछि सहमहामन्त्री भिष्मराज आङ्दम्बेले भने, ‘२०७९ मंसिर ४ गते हुने प्रतिनिधिसभा सदस्य र प्रदेशसभा सदस्यको निर्वाचन प्रयोजनका लागि नेपालको संविधानको धारा २७१ तथा राजनीतिक दल सम्बन्धी ऐन, २०७३ को दफा ४८ बमोजिम निर्वाचन आयोगमा दल दर्ता गर्ने र सोसम्बन्धी सम्पूर्ण प्रक्रिया पूरा गर्न नेपाली कांग्रेस केन्द्रीय कार्यालयका मुख्य सचिव कृष्णप्रसाद पौडेललाई जिम्मेवारी प्रदान गरिनेछ ।’
कांग्रेसले आगामी भदौ १० गतेदेखि २४ गतेसम्म निर्वाचन केन्द्रित राष्ट्रव्यापी अभियान पनि गर्नेभएको छ ।
प्रतिक्रिया